पोखरा । डा. बाबुराम भट्टराई नेतृत्वको नेपाल समाजवादी पार्टीले विधान अधिवेशन कात्तिक ५ र ६ गते पोखरामा गर्ने भएको छ ।
जनता समाजवादी पार्टीबाट अलग भएपछि २०७९ असारमा नेपाल समाजवादी दर्ता भएपछि पहिलो पटक पोखरामा विधान अधिवेशन हुन लागेको हो ।
अधिवेशनमा डा. भट्टराईले पार्टीको विधान र राजनीतिक प्रतिवेदन पेश गर्ने छन् । नयाँ संरचनामा गइसकेपछि पार्टी निर्माणको मोडालिटी, अबको बाटो र देश कसरी बनाउने सकिन्छ भन्नेबारे २ दिनसम्म गहन छलफल गर्ने डा. बाबुराम भट्टराईले जनाए ।
अधिवेशनपछि ३ तहमै पार्टी निर्माण र अभियानमा लाग्ने भट्टराईको भनाइ थियो । माओवादी त्यागेपछि नयाँ शक्ति पार्टी हुँदै नेपाल समाजवादीसम्म आइपुग्दा डा. भट्टराईले वैकल्पिक राजनीतिको अभ्यास गरेको र अब चाहिँ असली वैकल्पिक पार्टी कस्तो हुन्छ भनेर देखाउने भट्टराईले जनाए ।
सत्तादेखि सत्तासम्मको दौडजस्तो राजनीति बनेको भन्दै भट्टराईले समाजसँग राजनीति कसरी जोड्न सकिन्छ भनेर आफूहरुले गम्भीर छलफल गर्ने बताए । ‘पार्टीको घोषणापत्र र विधान अधिवेशनमा मिहिन छलफल हुन्छ’, डा. भट्टराईले भने, ‘वैकल्पिक राजनीतिक शक्ति निर्माणको आधारबारे छलफल गर्छौं ।’
वैकल्पिक शक्ति र सरकारका सिद्धान्त तथा प्रतिवद्धताहरु, आर्थिक विकास तथा समृद्धिको अवधारणा लक्ष्य र नीतिहरु, लोकतन्त्रको सवलीकरण, सुशासन, नयाँ वैकल्पिक शक्ति र समाजवादको अपरिहार्यता तय गरिने उनले जनाए ।
घोषणा पत्र, नीति तथा कार्यक्रम र अहिलेको पार्टीहरुप्रतिको दृष्टिकोण पनि प्रस्तुत गरिने भट्टराईको भनाइ थियो । माघसम्म महाधिवेशन पनि गरिने भट्टराईले जनाए ।
नेपाली समाजले तुरुन्तै फलको अपेक्षा गर्ने तर त्यसको प्रतिफल ढिलो प्राप्त हुने भट्टराईको भनाइ थियो । २०७२ सालमा संविधान जारी भएपछि एउटा राजनीतिक चरण सकिएको भन्दै आफूले नयाँ यात्रा सुरु गरेको र हिजोको नयाँ शक्ति निर्माणको अभियानमै रहेको भट्टराईले जनाए ।अधिवेशनमा देशभरबाट ५ सयभन्दा बढी सहभागी हुने नेता आमोद थापा (किरण) ले जानकारी दिए ।
