काठमाडौं । सभामुख देवराज घिमिरेले नेपाल—दक्षिण कोरियाबीचको सम्बन्ध सहयोगपूर्ण रहेको जनाएका छन्।
बुधबार काठमाडौंमा नेपाल—दक्षिण कोरियाबीच कूटनीतिक सम्बन्ध कायम भएको ५०औं वर्षगाँठको अवसरमा आयोजित कार्यक्रममा उनले यस्तो जनाएका हुन्। उनले दुई देशबीच सन् १९७४ मा स्थापना भएको कूटनीतिक सम्बन्ध लामो समयदेखि मैत्रीपूर्ण, पारस्परिक, समान सहकार्यमा आधारित र विभिन्न क्षेत्रमा सहयोगपूर्ण रहेको उल्लेख गरे।
उनले नेपाल र कोरियाबीच भएका उच्चस्तरीय सरकारी भ्रमण, व्यापारिक तथा सांस्कृतिक आदानप्रदान र दुई पक्षीय सम्झौताहरुले सम्बन्धलाई बलियो बनाएको जनाए।
उनले दुवै देशले एशियाली क्षेत्रको शान्ति र समृद्धिमा महत्वपूर्ण योगदान पुर्याउँदै आएको उल्लेख गरे। उनले कोरिया सरकारले नेपाललाई विकास साझेदार मुलुकको प्राथमिक सूचीमा राखेर विभिन्न क्षेत्रहरुमा विकास, साझेदार कार्यक्रम सञ्चालन गर्दै आएको उल्लेख गरे।
उनले दक्षिण कोरियाले रोजगार अनुमति प्रणाली (इपिएस)अन्तर्गत नेपाली युवाहरुलाई वैदेशिक रोजगारीमा अवसर प्रदान गरेको र नेपालमा रेमिट्यान्स आप्रवाहलाई थप बलियो बनाएको जनाए।
उनले भने, ‘दुई देशबीच सन् १९७४ मा स्थापना भएको कूटनीतिक सम्बन्ध लामो समयदेखि मैत्रीपूर्ण, पारस्परिक, समान सहकार्यमा आधारित र विभिन्न क्षेत्रमा सहयोगपूर्ण रहेको छ। नेपाल र कोरियाबीच भएका उच्चस्तरीय सरकारी भ्रमण, व्यापारिक तथा सांस्कृतिक आदानप्रदान र दुई पक्षिय सम्झौताहरुले सम्बन्धलाई बलियो बनाएको महशुस गरेको छु। दुवै देशले एशियाली क्षेत्रको शान्ति र समृद्धिमा महत्वपूर्ण योगदान पुर्याउँदै आएका छन्। कोरियाले रोजगार अनुमति प्रणाली (इपिएस)अन्तर्गत नेपाली युवाहरुलाई वैदेशिक रोजगारीमा अवसर प्रदान गरेको छ। यसले नेपालमा रेमिट्यान्स आप्रवाहलाई थप बलियो बनाएको छ।’
सभामुख घिमिरेले नेपालमा वैदेशिक लगानीको वातावरणलाई विश्वसनीय बनाउन कोरियाली कम्पनीहरुको भूमिका स्मरणयोग्य रहेको जनाए ।
