काठमाडौं । प्रधानमन्त्री केपी शर्मा ओलीले गृहमन्त्रीको बचाउ गरेका छन् ।
गृहमन्त्री रमेश लेखकले प्रारम्भिक जानकारीमा आएको विषय जनाएको भन्दै उनले यसलाई अयोग्यता वा अपराधका रुपमा लिन नहुने उनले जनाए । गत शनिबार भारी वर्षासँगै नख्खु खोलामा ठूलो बाढी आएपछि नख्खुडोलमा चार जना जस्तापाताको छनामा चढेका थिए ।
उद्धार पर्खिरहेका उनीहरुलाई केहीबेरमा नख्खु खोलाले बगायो । त्यसै दिन गृह मन्त्रालयमा बसेको बैठकपछि गृहमन्त्री रमेश लेखकले चार जनालाई बगाएको भन्दै बचाउन नसकेकोमा दुःख व्यक्त गरेका थिए । तर उनीहरुमध्ये २ जनालाई चणिकलाल तामाङ सहितले उद्दार गरे भने एक जना आफैं निस्किएका थिए । त्यसरी बगेका चारमध्ये एक जनाको अवस्था भने अज्ञात छ ।
बाढी पहिरोले गरेको क्षतिबारे जानकारी दिन मंगलबार आयोजित पत्रकार सम्मेलनमा प्रधानमन्त्री ओलीले गृहमन्त्रीले प्रारम्भिक जानकारीमा आएको विषय जनाएको दाबी गरे । ‘गृहमन्त्रीजीले आफैं गएर त हेर्न सक्ने कुरा आएन’ उनले भने, ‘बगाएर लग्यो, बचाउन सकिएन भनेर त्यहाँका मान्छेहरुले जे रिपोर्ट दिए, गृहमन्त्रीजीले त्यही भाषा बोल्नुभयो ।
बगाएर लग्यो, बचाउन सकिएन ।’ तर प्रारम्भिक जानकारी कहिले कहिले फरक पर्नसक्ने भन्दै उनले अगाडि भने, ‘यस विषयलाई धेरै ठूलो अपराध, अयोग्यताका रुपमा लिन हुँदैन जस्तो लाग्छ ।’
