काठमाडौँ / एन्फा महिला लिग फुटबलमा शनिबार भएका दुई खेल बराबरीमा सकिएका छन्। दशरथ रङ्गशालामा विभागीय टोली नेपाल पुलिस क्लब र त्रिभुवन आर्मी क्लबले १–१ गोलको बराबरी खेल्दै अङ्क बाँड्दा दिनको अर्को खेलमा कोशी र संकटाले गोलरहित बराबरी खेले।
रङ्गशालामा भएको खेलमा पहिलो हाफ गोलरहित बराबरी भए पनि दोस्रो हाफमा भने पुलिसले अग्रता बनाउन सफल भयो। पुलिसका लागि अमृता जैशी र आर्मीका लागि अमिशा कार्कीले समान १–१ गोल गरेका थिए। खेलको ४८औँ मिनेटमा गोल गर्दै पुलिसलाई अग्रता लिँदा ६३ औं मिनेटमा आर्मीकी अमिशाले बराबरी गोल फर्काइन्।
बराबरीपछि पनि पुलिसले लिग अङ्क तालिकामा आफ्नो अग्रता कायम राखेको छ। पुलिसको ५ खेलबाट ११ अंक बनाउँदा आर्मीले ५ खेलमा १० अंक बनाएको छ। दिनको दोस्रो खेलमा संकटा र कोशीले गोलका राम्रा प्रयास गरे पनि सफल हुन भने सकेनन्।
दुवै टोलीले पहिलो र दोस्रो हाफमा केही सुन्दर अवसर बनाएका थिए। बराबरीपछि ५ खेलबाट कोशी १० अङ्क बनाएर तेस्रो स्थानमा उक्लिएको छ। संकटा भने ५ खेलबाट ५ अङ्क बनाएर सातौं स्थानमा रहेको छ।
