बैतडी । तीन दिनदेखि लगातार भइरहेको भारी वर्षाका कारण सुदूरपश्चिम प्रदेशका पहाडी जिल्ला जोड्ने चार वटा मुख्य सडक भीमदत्त लोकमार्ग, दशरथचन्द लोकमार्ग, जयपृथ्वी लोकमार्ग र महाकाली लोकमार्गका ठाउँठाउँमा पहिरो खस्दा यातायात अवरुद्ध भएको छ । बैतडीको खोड्पेमा भारी वर्षासँगै हावाहुरी चल्दा बजारका तीन वटा पसल र स्थानीय विद्यालयको छाना उडाएको छ ।
पहिरोले बैतडीको खोड्पे–बझाङ जोड्ने जयपृथ्वी लोकमार्गको साणीघाँटी, ढोले र बजपानी आसपासका क्षेत्रमा पहिरो खस्दा यातायात अवरुद्ध भएको पाटन नगरपालिका–८, वडा अध्यक्ष हरिस बिष्टले जानकारी दिनुभयो । त्यसैगरी बैतडी–डडेलधुरा जोड्ने दशरथचन्द लोकमार्गको भालुमारेमा पहिरो खस्दा बिहानैदेखि यातायात अवरुद्ध भएको उहाँले जानकारी दिनुभयो ।
“पाटन नगरपालिकाको खोड्पे क्षेत्रमा हावाहुरीसँगै लगातार ठुलो वर्षा भइरहेको छ,” वडा अध्यक्ष बिष्टले भन्नुभयो, “हावाहुरीले बजारका तीन वटा पसको छाना उडाएको छ । खोड्पेमै रहेको सिद्धदीप आधारभूत विद्यालयको छाना उठाएको छ । भारी वर्षा र हावाहुरीका कारण घरबाहिर निस्कन सक्ने अवस्था छैन ।”
बैतडी सदरमुकाम जोड्ने दशरथचन्द लोकमार्गको कठपतेमा पहिरोसँगै हावाहुरीले सडकमा ठुलठुला रुख ढलेका छन् । रातीदेखि अवरुद्ध भएको सडक शुक्रबार बिहान दशरथचन्द नगरपालिकाको डोज र प्रहरी टोलीले रुख र पहिरो सफा गरेर सडक सूचारु गरिएको जिल्ला प्रहरी कार्यालय बैतडीका प्रमुख प्रहरी नायब उपरीक्षक दीपक गिरीले जानकारी दिनुभयो ।
त्यसैगरी बैतडीको पाटन–पञ्चेश्वर सडकखण्डको सुल्लेखान, मेलोली लगायतका क्षेत्रमा पहिरो खसेको छ । पाटन–पञ्चेश्वर सढक खण्डको सुल्लेखानमा खसेको पहिरो सफा गरेर बिरामी बोकेको एम्बसुलेन्स गन्तव्यतर्फ पठाइएको प्रहरी नायब उपरीक्षक गिरीले बताउनुभयो ।
सुदूरपश्चिम प्रदेश प्रहरी कार्यालयका अनुसार डडेल्धुरामा भीमदत्त राजमार्ग अवरुद्ध भएको छ । फल्टुडे, खानीडाँडा, मेलखर्क, बुडर, भासुभिर, रडुवा, आलिताल लगायत क्षेत्रमा सडक अवरुद्ध भएको छ ।
अविरल वर्षाका कारण सडक खसेको पहिरोले डडेल्धुरा जोड्ने भीमदत्त लोकमार्ग अवरुद्ध भएको छ । गन्यापधुरा गाउँपालिका–१ को साहुखर्कमा भीमदत्त राजमार्ग बिहीबार राती खसेको पहिरोले अवरुद्ध भएको प्रहरीले जनाएको छ । साहुखर्कमा बिहीबार साँझदेखि नै पहिरो खसिरहेको थियो । पहिलो हटाउने प्रयास भइरहे पनि लगातारको वर्षाले समस्या भइरहेको बताइएको छ ।
डोजरले पहिरो पन्छाएर सवारीसाधन सूचारु गरिए पनि पुनः ठूलो पहिरो खसेकाले अवरोध हटाउन समय लाग्ने देखिएको प्रहरीले जनाएको छ । राजमार्ग अवरुद्ध हुँदा पहाडी जिल्लाबाट गन्तव्यका लागि छुटेका सवारी साधन बाटोमै रोकिएका छन् ।
