काठमाडौँ / सहकारी पीडित बचतकर्ता संरक्षण राष्ट्रिय अभियान महासंघले तत्काल पीडितको रकम फिर्ता दिने प्रत्याभूति दिलाउन सरकारसँग माग गरेको छ।
शनिबार सिंहदरबारमा सहकारी संस्था बचत रकम दुरुपयोग संसदीय छानबिन विशेष समितिले बोलाएको छलफलमा महासंघका पदाधिकारीहरुले सरकारसँग सो माग गरेका हुन्। उनीहरुले सहकारी पीडितहरुको मागलाई सहज ढंगले बुझिदिन पनि आफूहरुलाई आग्रह गरेको समितिका सभापति सूर्य थापाले जानकारी दिए।
छलफलमा कान्तिपुर, गौतमश्री, लालीगुराँस, देउराली, गुडवीलजस्ता सहकारीका वचतकर्ताहरु पनि उपस्थित भएको र उनीहरुबाट पीडितको माग सम्बोधन गर्नका लागि आफूहरुलाई सहज भएको अनुभूति भएको पनि विशेष समितिले जनाएको छ।
सभापति थापाले भने,‘समस्या समाधानको उपाय बचतकर्ताको बचत रकम फिर्ता प्रत्याभूति हो भन्ने कुरामा उहाँहरुले जोड दिनुभएको छ। कयौँ नक्कली ऋणी, नक्कली अरु कारोबार सहकारीको समस्या हो। नक्कली दावीहरु पनि प्रस्तुत भएको जस्ता कुराहरु पनि राख्नुभएको छ। कान्तिपुर, गौतम श्री, लालीगुराँस, देउराली, गुडवीलजस्ता सहकारीमा बचत गरेकाहरु रहेका छन्। यो छलफलले हामीलाई पीडितको माग सहज ढंगले बुझन सजिलो भएको छ। हामीले उहाँहरुलाई भनेका छौ ऋणी र बचतकर्ता फरक हो।’
