काठमाडौं । आम द्वन्द्वपीडित समुदायहरूले दण्डहीनताविरुद्ध शान्तिपूर्ण प्रदर्शन तथा धर्ना ध्यानाकर्षण कार्यक्रमको आयाेजना गरेका छन्।
समुदायहरूले बिहीबार बिहान पनि बानेश्वरमा शान्तिपूर्ण प्रदर्शनकाे आयाेजना गरेकाे हाे। समुदायले पीडकलाई उन्मुक्ति दिने प्रावधानहरू संशोधन गर भन्दै प्रदर्शन गरेका हुन्। सङ्क्रमणकालीन न्यायसम्बन्धी संशोधन विधेयकमा त्रुटि भएकाे भन्दै प्रदर्शन गरिएकाे हाे।
प्रतिनिधिसभामा बहुमतले पारित भएकाे सङ्क्रमणकालीन न्यायसम्बन्धी संशोधन विधेयकका कतिपय प्रावधानहरू त्रुटिपूर्ण रहेकाे समुदायले जनाएकाे छ।
पीडा र अन्यायमा वर्षाैंदेखि पिल्सिरहेका पीडितहरूकाे सत्य, न्याय र परिपूरण अधिकार कुण्ठित गरेकाे समुदायकाे भनाइ छ। हिजाे नेपाल माओवादी पीडित संघले शान्तिपूर्ण धर्नाको आयाेजना गरेकाे थियाे।
संशोधनसम्बन्धी विधेयक राष्ट्रियसभामा विचाराधीन छ। अन्तर्राष्ट्रिय संस्थाहरूले पनि विधेयकमा धेरै कमजोरी रहेको बताएका छन्। ह्यूमन राइट्स वाच, इन्टर्न्याश्नल कमिसन अफ जुरिस्ट्स र एम्नेस्टी इन्टर्न्याश्नलले मंगलबार विधेयकमा धेरै कमीकमजाेरी रहेकाे जनाउँदै संयुक्त विज्ञप्ति जारी गरेका थिए।
