काठमाण्डौ / नेपालका लागि पाकिस्तानका राजदूत अब्रर एच हास्मीले दक्षिण एसियाको समृद्धिका निम्ति दक्षिण एसियाली क्षेत्रीय सहयोग सङ्गठन ९सार्क०लाई नवजीवन दिनुपर्नेमा जोड दिनुभएको छ । यहाँ आयोजित एक कार्यक्रममा राजदूतले आपसी एकता र सहयोग कायम गर्दै क्षेत्रीय सहयोगको माध्यमबाट यस क्षेत्रका जनताको जीवनस्तर उठाउने उद्देश्यका साथ स्थापना भएको सार्कलाई निष्क्रिय बनाउन नहुने धारणा राख्नु भयो । सार्कको लक्ष्य र उद्देश्य दक्षिण एसियामा शान्ति स्थापना, आर्थिक, सामाजिक, सांस्कृतिक, प्राविधिक, वैज्ञानिक क्षेत्रमा आपसमा सहयोग आदानप्रदान गर्नु रहेको भन्दै राजदूत हास्मीले जलस्रोत, ऊर्जा, जलवायु परिवर्तन, प्राकृतिक विपत्ति, कृषि, स्वास्थ्य, वातावरण, खाद्य सुरक्षाजस्ता दक्षिण एसियाका जनताका विषयलाई सार्कले सम्बोधन गर्दै आएको स्मरण गर्दै यस्लाई निस्क्रिय गराउँदा कसैलाई पनि फाईदा नभएको धारणा राख्नु भयो । दक्षिण एसियाको आर्थिक वृद्धि, समाजिक प्रगति तथा सांस्कृतिक विकास, आपसी विश्वास र समझदारी विस्तार, साझा हितका मामिलामा अन्तर्राष्ट्रिय मञ्चहरू सहयोग सुदृढ गर्ने तथा समान लक्ष्य र उद्देश्य भएका अन्य अन्तर्राष्ट्रिय र क्षेत्रीय सङ्गठनसँगको साझेदारीबाट सार्कलाई गतिशील बनाउन सकिने उहाँले तर्क उहाँले राख्नु भयो । सन् २०१६ को नोभेम्बर ९ र १० मा पाकिस्तानको राजधानी इस्लामावादमा हुने तय भएको सार्कको १९ औँ शिखर सम्मेलन आजसम्म हुन नसकेकोमा चिन्ता व्यक्त गर्दै राजदूत हास्मीले सम्मेलन आयोजना गर्न आफ्नो देश तयार रहेको सो अवसरमा सुनाउनु भयो । “अध्यक्ष राष्ट्र नेपालले सम्मेलन आयोजना गर्ने जानकारी दिएको दुई महिनामा हामी सम्पूर्ण तयारी पूरा गरेर सफलतापूर्वक शिखर बैठक सम्पन्न गर्नेछौँ”, राजदूत हास्मीले भन्नु भयो । काठमाण्डौ स्थित पाकिस्तानी दूताबासको प्रांगणमा आयोजित सो कार्यक्रममा बिभिन्न बौद्धिक ब्यक्तित्वहरु, मानव अधिकारकर्मीहरु,पत्रकारहरुले पनि सार्क संगठनलाई सक्रिय बनाईर यो क्षेत्रमा शान्ति,स्थिथरता र बिकासलाई प्राथमिकता दिनु पर्नेमा जोड दिनुभएको थियो ।
