काठमाडौं । उपप्रधान तथा अर्थमन्त्री विष्णुप्रसाद पौडलेले नेपालमा उत्पादित वस्तुहरुको निर्यात प्रवर्द्धन गर्न सरकारले विशेष पहल गर्ने जनाएका छन् ।
निर्यात प्रवर्द्धन गर्न नीतिगत र व्यवहारिक समस्या हटाउँछौं : अर्थमन्त्री पौडेल निर्यात व्यवसायी महासंघ नेपालका प्रतिनिधिसँग बुधबार भएको भेटमा अर्थमन्त्री पौडेलले निर्यात प्रवर्दन गर्न सरकारले नीतिगत र व्यवहारिक रुपमा देखा परेका समस्याहरुलाई हटाउने जनाए । समस्यालाई प्राथमिकीकरण गर्न व्यवसायीलाई आग्रह गर्दै उनले प्राथमिकीकरणको आधारमा समाधानका उपाय खोज्नेसमेत जनाए । अर्थमन्त्रीसँग भेटको क्रममा निर्यात व्यवसायी महासंघले नेपालमा अन्तर्राष्ट्रियस्तरको प्रदर्शनी केन्द्र निर्माणको गुरुयोजनाका लागि बजेटको व्यवस्था गर्नुपर्ने माग गरे ।
उनीहरुले नेपालमा अन्तर्राष्ट्रिय निर्यात एक्स्पो आयोजना गर्न, निर्यात प्रवर्दन तथा वस्तु विकास गर्न अधिकार सम्पन्न बोर्डको स्थापना गर्न माग गरे ।
त्यसैगरी महासंघले उत्पादन लागत कम गर्न निर्यातजन्य उद्योगहरुलाई लगानी गर्दा बैंक ब्याजदरमा ५ प्रतिशतको अनुदान, बैंकहरुको कुल ऋण प्रवाहको ५ प्रतिशत निर्यातजन्य उद्योगहरुमा अनिवार्य लगानीको व्यवस्था गर्नुपर्ने माग राखे । निर्यात–आयात बैंक स्थापना गरी निर्यात उद्योगलाई आवश्यक पर्ने कच्चा पदार्थ आयातको व्यवस्था गर्नुपर्ने लगायत १७ बुँदे सुझावसमेत दिइएको छ ।
