काठमाडौं । बर्दिया, बाँसगढी नगरपालिका-३ बाट अवैध लागूऔषध ब्राउनसुगर जस्तो देखिने पदार्थ ५० मिलिग्राम सहित २ जनालाई आइतबार दिउँसो प्रहरीले पक्राउ गरेको छ । पक्राउ पर्नेरूमा सोही ठाउँ बस्ने २९ वर्षीय बेण्ड कुमार थारू र १९ वर्षीय सरोज कुमार थारू रहेका छन् ।
बेण्ड कुमारको घरमा लागूऔषध कारोबार भइरहेको भन्ने सूचनाको आधारमा जिल्ला प्रहरी कार्यालय बर्दियाबाट खटिएको प्रहरीले उनको घर तलासी गर्दा उक्त पदार्थ फेला पारी दुवै जनालाई पक्राउ गरेको हो ।
कैलाली, घोडाघोडी नगरपालिका-१० पहलवानपुर बजारबाट अवैध लागूऔषध ब्राउनसुगर जस्तो देखिने पर्दाथ १ सय २० मिलिग्राम सहित सोही ठाउँ बस्ने २५ वर्षीय प्रकाश सिंह महतोलाई आइतबार बिहान प्रहरीले पक्राउ गरेको छ । इलाका प्रहरी कार्यालय सुखडबाट खटिएको प्रहरीले उनलाई पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको छ ।
