काठमाडौं / सदनका दुई ठूला दल कांग्रेस र एमालेबीचको गठबन्धन र आलोपालो सरकार बनाउने सहमतिको सम्बन्ध नक्कली भुटानी शरणार्थी प्रकरणसँग जोडिएको खुलासा भएको छ । सरकारले नक्कली भुटानी शरणार्थीका मुख्य आरोपी बेचन झालाई पक्राउ गर्नु, यो प्रकरणमा अनुसन्धान अघि बढ्दा कांग्रेसका ठूला नेता नै पक्राउ पर्ने सम्भावना हुनुका कारण कांग्रेस र एमाले शीर्ष नेताहरु वर्तमान सरकार ढलाउने र नयाँ सरकार गठन गर्ने सहमतिमा पुगेका हुन् ।
गत फागुनमा मात्र सत्ता सहकार्य थालेका माओवादी र एमालेबीच चार महिनामै फाटो आउनुलाई अप्रत्याशित मानिएको थियो । कांग्रेस सभापति शेरबहादुर देउवा र एमाले अध्यक्ष केपी ओलीबीच १५ असारमा भएको राजनीतिक भेटले त सरकार नै ढल्ने अवस्था निम्तियो । तर यसको कारण भने नक्कली भुटानी शरणार्थी प्रकरणका २ फरार आरोपी बेचन झा र प्रतीक थापा पक्राउ पर्नु, यो प्रकरणमा दोस्रो चरणको अनुसन्धान सुरु हुनु थियो ।
झा यो प्रकरणका मुख्य योजनाकार हुन् । उनी कांग्रेस सभापति देउवाकी पत्नी आरजु देउवा र पूर्वगृहमन्त्री समेत रहेका कांग्रेस नेता कृष्ण सिटौलानिकट मानिन्छन् । प्रतीक पूर्वगृहमन्त्री एवं नेकपा एमालेका उपाध्यक्ष रामबहादुर थापा ‘बादल’ का छोरा हुन् । नक्कली भुटानी शरणार्थी प्रकरणमा नाम जोडिए पनि झन्डै एक वर्षअघि अदालतमा पेश गरिएको अभियोगपत्रमा झालाई प्रतिवादी बनाइएको थिएन । तर, उनले तत्कालीन गृहमन्त्री बालकृष्ण खाण र गृहसचिव टेकनारायण पाण्डेमार्फत तत्कालीन देउवा नेतृत्वको सरकारलाई पनि नक्कली भुटानी शरणार्थी प्रकरणमा प्रभावित पारेको अनुसन्धानको क्रममा देखिएको छ ।
असार १४ मा पक्राउ परेका झालाई प्रहरीले हिरासतमा राखेर नक्कली शरणार्थी प्रकरणमा उनको संलग्नताबारे अनुसन्धान गरिरहेको छ । मन्त्रिपरिषद्मै लगेर निर्णय गराउने र गृहमन्त्रीलाई पकडमा लिएर आवश्यक निर्देशन बाहिर ल्याउनेसम्मको भूमिकामा बेचन सक्रिय रहेको अहिले अडियो रेकर्ड पनि सार्वजनिक भएको छ । गृहमन्त्री खाण (२०७८ असार २९–२०८० वैशाख २६) र गृहसचिव पाण्डे कार्यकारी रहेका बेला झाले बालुवाटार–सिंहदरबार ‘नेक्सस’ मिलाएको उनको त्यतिबेलाको संवादले देखाएको छ । यो प्रकरणमा झालाई आरजु तथा अन्य कांग्रेस नेताको पनि सहयोग थियो ? प्रहरी अनुसन्धानरत छ ।
झाले आफूलाई सिंहदरबार र बालुवाटारदेखि भारतीय दूतावाससम्मको ‘निकटवर्ती’ भनेर चिनाउने गर्थे । उनको संलग्नताबारे तत्कालीन गृहसचिव पाण्डे तथा रामशरण केसीसहितले बयान दिइसकेका छन् । पछिल्लो समय गिरीबन्धु टी–इस्टेट प्रकरणमा एमाले अध्यक्ष ओलीको आलोचना हुनु र नक्कली भुटानी शरणार्थी प्रकरणले कांग्रेस लखेटिनुका कारणले पनि यी दुई दललाई एक ठाउँमा आउन सहज भएको छ ।
कांग्रेस र एमालेबीचको गठबन्धनमा आशंका गर्नुपर्ने प्रशस्त ठाउँ रहेको माओवादी तथा रास्वपाका सांसदहरुले संसद्मा नै बोलेका छन् । रास्वपा नेताहरुले नक्कली भुटानी शरणार्थी प्रकरणमा जोडिएका झा पक्राउ परेपछि नयाँ सरकार गठनका लागि दुई ठूला दल एक ठाउँमा उभिएको दाबी गरेका छन् । झालाई पक्राउ गरिएको भोलिपल्ट कांग्रेस र एमालेबीच सत्ता साझेदारीका लागि सहमति भएको उनीहरुको भनाइ छ । रास्वपाका सांसद मनिष झाले संसदमा एमालेका नेताहरुले आफूहरुलाई नैतिकता सिकाउन खोजेको टिप्पणी गरे ।
माओवादी केन्द्रका सांसद लेखनाथ दाहालले झा पक्राउ गरेपछि गठबन्धन बदलिएको दाबी गरेका छन् । गत मंगलबार प्रतिनिधि सभा बैठकमा बोल्दै उनले ४ महिनाअघि एमाले अध्यक्ष केपी ओलीले गरेको पटक पटकको आग्रहलाई प्रचण्डले स्वीकार गरेर समीकरण बदलिएको जनाए । तर भ्रष्टाचार विरोधी अभियान सञ्चालन गर्दै जाँदा झा र थापाको गिरफ्तारी भएसँगै गठबन्धन टुटेकाले ओलीले जवाफ दिनैपर्ने उनको भनाइ छ । झा पक्राउ परेपछि उनीसँग बयान लिन समेत रोकिएको सांसद दाहालले दाबी गरे । उनले भने, ‘बेचन झा को हुन् हामीलाई थाहा छैन ? नेपाली जनतालाई थाहा छ । बेचन झा को हुन् त्यो राम्रोसँग बालकोटलाई पनि थाहा छ बूढानीलकण्ठलाई पनि थाहा छ । झा पक्राउ परेपछि अहिले बयान नलिनुस्, असार २८ गतेपछि मात्र लिनुस् भनेर फर्मान जारी भएको विषय पनि बजारमा आएको छ ।’
रास्वपाका सांसद हरि ढकालले सरकार बनेपछि फाइल खोल भनेर धेरैतिरबाट आवाज गुञ्जायमान हुँदै गर्दा झा पक्राउ पर्ने बितिकै सरकार परिवर्तन हुनुको कारण नागरिकले राम्रैसँग बुझेको बताए । माओवादी केन्द्रका महासचिव देव गुरुङले पनि वामपन्थीहरूको सहकार्य छाडेर एमाले दक्षिणपन्थी दिशामा अगाडि बढेको आरोप लगाए । टिआरसी विधेयकलाई रोक्ने र नक्कली भुटानी शरणार्थी प्रकरणमा झा पक्राउ परेपछि नयाँ गठबन्धन बनेको उनको जिकिर छ । जनधारणा साप्ताहिक
