काठमाडौं । प्रधानमन्त्री पुष्पमकल दाहाल ‘प्रचण्ड’ले संसदमा आफ्नो भारत भ्रमण र राष्ट्रपति रामचन्द्र पौडेलको स्वीजरल्याण्ड र जर्मनी भ्रमणबारे औपचारिक जानकारी गराएका छन्।
बिहिबारको जारी प्रतिनिधिसभा बैठकमा जवाफ दिने क्रममा प्रचण्डले उक्त भ्रमणहरुको जानकारी गराएका हुन्। आगामी आर्थिक बर्षको बजेटको मन्त्रालयगत विनियोजमाथिको छलफल चलिरहेको जारी संसद बैठकमा सांसदहरुले राष्ट्रपति र प्रधानमन्त्रीको विदेश भ्रमणको जानकारी गराउन सभामुखमार्फत माग गरेका थिए।
जवाफका क्रममा प्रचण्डले यसपटकको भारत भ्रमण एजेन्डामा आधारित नभएको उल्लेख गरेका छन्। सदनमा प्रचण्डले भने,‘नरेन्द्र मोदीले भारतीय प्रधानमन्त्रीको रुपमा शपथ ग्रहण गर्दा यसअघि दुईपटक नेपालबाट प्रधानमन्त्री नै जानु भएको थियो।
यसपटक पनि लिखित रुपमै निम्तो आएपछि म भारत गएको हुँ। मोदीको शपथमा जाँदा दुई देशको सम्बन्धलाई थप बलियो बनाउने, भएका सम्झौतालाई कार्यान्वयन गर्ने, पन्चेश्वर आयोजना अघि बढाउने विषयमा गम्भीर छ्लफल भएको थियो।’ उनले थपे,‘भारतीय राष्ट्रपति द्रौपदी मुर्मुसँग पनि भेटवार्ता भयो।
दिल्लीमा रहँदा भारतका विभिन्न राजनीतिक दलका नेतासँग पनि भेट भएको छ।’ प्रचण्डले राष्ट्रपति रामचन्द्र पौडेलको स्वीजरल्याण्ड र जर्मनी भ्रमणबारे पनि जानकारी गराए। प्रधानमन्त्रीले आज सदनमा बजेटमाथि उठेका जिज्ञासाको जवाफ दिँदैछन्।
