नवलपुर । नवलपरासी (बर्दघाट-सुस्ता पूर्व) को कावासोतीमा ड्रेन निर्माण गर्ने क्रममा पुरिएर तीन जना मजदुरको मृत्यु भएको घटनामा दुई पक्षबीच १० बुँदे सहमति भएको छ। शुक्रबार दिउँसो कावासोती नगरपालिकामा सरोकारवाला निकाय र पीडित परिवारबीच भएको छलफलमा १० बुँदे सहमति भएको हो।
बिहीबार वडा २ स्थित फलफूल चोकदेखि पूर्व नाला पाटीमा ढिस्कोले पुरिएर २१ वर्षीया सेती राना, २६ वर्षीया तानमाया मस्राङ्गी र ३२ वर्षीय चमेली सिंजालीको मृत्यु भएको थियो। मृतकहरूको सम्मानमा घटनास्थलमा शिलालेख तयार गर्ने सहमति भएको छ। त्यस्तै मृतक परिवारलाई एक घर एक रोजगारको ग्यारेन्टी गर्ने र रोजगारमा निरन्तरता दिने, मृतकका बालबच्चालाई कक्षा १२ सम्मको शैक्षिक सामग्रीसहित अध्ययन व्यवस्थापन गर्ने र मृतक परिवारको स्वास्थ्य बीमा गराउने सहमति भएको हो।
त्यसैगरी प्रति परिवार मृतकका बालबच्चाका नाममा ५ लाख मुद्दती खाता खोलेर जम्मा गर्ने र राहतस्वरूप ५ लाख नगद मृतक परिवारलाई उपलब्ध गराउने पनि सहमति पत्रमा उल्लेख छ।
नगरपालिकाले किरिया खर्चवापत ५० हजार नगद पनि दिने भएको छ। शव व्यवस्थापनमा लाग्ने खर्च पनि पालिकाले व्यहोर्ने भएको छ। नगरपालिकाको तर्फबाट उपप्रमुख फूलकुमारी थनेतसहित वडाध्यक्षहरू बैठकमा सहभागिता जनाएका थिए । तीन जना मजदुरको मृत्यु भएपछि शुक्रबार स्थानीयले कावासोती नगरपालिका भवनमा ढुंगामुढा गरी तोडफोड समेत गरेका छन्। प्रहरीले भीडलाई तितरबितर पार्न अश्रुग्यास समेत प्रहार गरेको थियो।
