नयाँ दिल्ली । कोइलाखानीबाट जंगलमा हुने क्षतिविरुद्ध अभियान चलाएका ४३ वर्षीय भारतीय नागरिक आलोक शुक्लाले ‘ग्रीन नोबेल’ समेत भनिने गोल्डम्यान पर्यावरण पुरस्कार पाएका छन् । सन् २०१२ देखि उनले भारतको छत्तीसगढमा प्रस्तावित कोइलाखानीका कारण हास्देओ अरन्य वनमा क्षति हुने जनाउँदै सोही समयदेखि लगातार अभियान सञ्चालन गर्दै आएका थिए । उनको अभियानले चार लाख ४५ हजार एकड जमिनमा फैलिएको जैविक विविधतायुक्त वन जोगिएको थियो । त्यहाँ २१ कोइला खानी बनाउने योजना रहेकोमा उनको अभियानले ती योजना रद्द गरिएका थिए ।
छत्तीसगढको सो वनमा योजना गरिएका २१ कोइला खानीसम्बन्धी निर्णय उनको प्रतिरोध आन्दोलनका कारण सरकारले जुलाई २०२२ मा रद्द गरेको थियो ।उनले वन संरक्षणका लागि खेलेको भूमिकाको मूल्यांकन गर्दै उनी अहिले २ लाख अमेरिकी डलर बराबरको पुरस्कार प्राप्त गर्ने सूचीमा परेका हुन् । अमेरिकाको सानफ्रान्सिस्कोस्थित गोल्डम्यान इन्भाएरमेन्ट फाउन्डेसनले सन् १९८९ देखि हरेक वर्ष सो पुरस्कार प्रदान गर्दै आएको छ ।
हालसम्म ९५ देशका २२६ जनाले सो पुरस्कार पाइसकेका छन् । जसमध्ये १०२ महिला छन् । पुरस्कारको उद्देश्य ग्रासरुट क्षेत्रका वातावरणको संरक्षणमा लागेका व्यक्तिलाई प्रोत्साहन गर्नु रहेको छ ।
उनीसँगै ब्राजिल, अष्ट्रेलिया, स्पेन, अमेरिका र दक्षिण अफ्रिकाका ग्रासरुट तहमा वातावरण संरक्षण गर्न योगदान गर्ने व्यक्तिहरूले समेत २०२४ को सो पुरस्कार पाएका छन् । बीबीसी
