काठमाडाैं । वेस्ट इन्डिजले चौथो टी-२० मा पनि नेपाललाई २१० रनको विशाल लक्ष्य दिएको छ।
कीर्तिपुरस्थित त्रिवि क्रिकेट मैदानमा बिहीबार टस जितेर ब्याटिङ रोजेको वेस्ट इन्डिजले जोनसन चार्ल्स र एन्ड्रु फ्लेचरको अर्धशतकमा तीन विकेट गुमाउँदै २०९ रन बनाएको हो।
फ्लेचरले ५४ बलमा नौ चौका र चार छक्का प्रहार गर्दै ८४ रन बनाए। त्यस्तै, चार्ल्सले ३० बलमा तीन चौका र ६ छक्का प्रहार गर्दै ५८ रन बनाए। वेस्ट इन्डिजका लागि फबियन अलेनले ३३ रन बनाए।
नेपालका लागि कुशल भुर्तेलले दुई र प्रतिश जीसीले एक विकेट लिए। अन्य बलर महंगा सावित भए। पाँच खेलको टी-२० शृङ्खलाका लागि नेपाल भ्रमणमा रहेको वेस्ट इन्डिजको ‘ए’ टोलीले दुई खेल जितिसकेको छ।
नेपालले एक खेल जितेको छ भने एक खेल बाँकी छ। यसअघि बुधबार भएको खेलमा वेस्ट इन्डिजले नेपाललाई २२८ रनको लक्ष्य दिएको थियो। नेपाल ७६ रनले पराजित भएको थियो।
