काठमाडौँ / अर्थमन्त्री वर्षमान पुनले लगानी सम्मेलनलाई सफल बनाउनका लागि सबै राजनीतिक दलहरु एक ठाउँमा रहेको जनाएका छन्।
सोमबार काठमाडौँमा लगानी सम्मेलनको पूर्वसन्ध्यामा आयोजित अन्तरक्रिया कार्यक्रममा बोल्दै उनले कुनै राजनीतिक दल, सरकार र गठबन्धन विशेषको लगानी सम्मेलन नभएकाले देशको हित हुने काममा सबै राजनीतिक दलहरु एक ठाउँमा रहेको जिकिर गरे।
उनले सत्तापक्ष, प्रतिपक्ष र कहिले गठबन्धनमा भए पनि वैदेशिक लगानी र आन्तरिक लगानीमा राजनीतिक दलहरुका प्रतिबद्धताहरु समान रहेको उल्लेख गरे।
उनले लगानी सम्मेलनमा सत्तापक्ष र प्रतिपक्ष भन्ने भाव नरहने दाबी गरे। प्रतिबद्धताहरु, नीतिका निरन्तरताहरु लगानी सम्मेलनमा देख्न सकिने उनको भनाइ थियो।
उनले सत्ता समीकरण परिवर्तन भएका बेलामा देशको नीति परिवर्तन नभएको भन्दै लगानीका लागि सरकारले आवश्यक वातावरण बनाउने जनाए।
उनले भने, ‘अब राजनीतिक रुपले लगानी सम्मेलन के हुन्छ भन्ने प्रश्न छ। कुनै पार्टी, सरकार विशेषको, कुनै गठबन्धन विशेषको नहोस् भनेर हामी यसलाई उद्घाटनदेखि समापनसम्म सबै सेसनमा सबै प्रवृत्तिहरु देखिने गरी काम गर्दैछौँ। त्यहाँ विज्ञ पनि होस्, लगानीकर्ताहरु पनि होउन्, राष्ट्रिय, अन्तर्राष्ट्रिय रुपले लेण्डरहरु पनि होउन्, अरु सक्सेस स्टोरीहरु होउन्। जसले सबैलाई प्रेरित गरोस्। त्यसका निम्ति हामी देशभित्र सबै राजनीतिक दलहरुको अनुहार देखियोस्। जसले हामी कहिले सत्ता पक्ष हुन्छौँ, कहिले प्रतिपक्ष हुन्छौँ, कहिले गठबन्धन हुन्छौँ, कहिले गठबन्धन हुँदैनौँ। तर वैदेशिक लगानी र आन्तरिक लगानीमा हाम्रा प्रतिबद्धताहरु समान छन्।’
अर्थमन्त्री पुनले लगानीकर्ताहरुले प्रतिबद्धता व्यवहारमा देखाउने कुरा र नीतिको निरन्तरतामा विशेष जोड दिएको बताए। उनले नेपालमा रहेका लगानीकर्ताहरुको मनोबल उच्च भयो भने र उत्साहित भए भने मात्रै अरु लगानी कर्ता आउने भएकाले सरकार त्यसमा लागिरहेको जनाए।
