काठमाडौं । नेकपा (एमाले)को महाधिवेशन प्रतिनिधि परिषद्को बैठकमा आइतबार समूहगत छलफलको निचोड प्रस्तुत गर्ने क्रममा एमाले नेता तथा लेखा समितिका सभापति ऋषिकेश पोखरेलले पार्टीका उच्च नेताहरुप्रति व्यंग्यवाण कसेका छन्। उनले एमालेभित्र मौलाएको दारुबाजी, जुवातास र तडकभडकपूर्ण शैलीको विरोध गर्दै यसलाई सच्चाएर अघि बढ्नुपर्ने जनाएका थिए।
समूह ५ का संयोजकसमेत रहेका पोखरेलले निचोड प्रस्तुत गर्ने क्रममा भने- ‘एमालेभित्र जति ठूला नेता भए, उनका छोराछोरीको बिहे उत्तिकै तडकभडकपूर्ण हुन थालेको छ।’
त्यस्तै, उनले भने- ‘एमाले नेताहरुलाई चार बजेपछि भेट्न सकिँदैन। साँझको संस्कृतिले एमालेलाई चुर्लुम्मै डुबायो।’
त्यस्तै, उनले बिदाका दिन पनि एमाले नेताहरुलाई भेट्न नसकिने बताए। ‘बिदाका दिन पनि एमाले नेताहरुलाई भेट्न सकिँदैन। कि उनीहरु तासको खालमा व्यस्त हुन्छन् कि होटलमा व्यस्त हुन्छन्।’
लतिलपुरको गोदावारीस्थित सनराइज हलमा जारी बैठकमा अध्यक्ष केपी शर्मा ओलीले राजनीतिक प्रतिवेदन, महासचिव शङ्कर पोखरेलले साङ्गठनिक प्रतिवेदन पेश गरेका थिए। ती प्रतिवेदनमाथि छलफल भइसकेपछि छलफलको निचोड प्रस्तुत गरिएको हो।
अध्यक्ष ओली अस्वस्थ भई अनुपस्थित भएपछि वरिष्ठ उपाध्यक्ष ईश्वर पोखरेलले बैठकको अध्यक्षता गरिरहेका छन्।
