काठमाडाैं । नेपाली कांग्रेसले गृहमन्त्री रवि लामिछानेमाथि प्रश्न उठाएको छ। सहकारी ठगी प्रकरणमा मुछिएका रवि लामिछानेलाई गृहमन्त्री बनाइएको भन्दै काँग्रेसले बुधबारको प्रतिनिधिसभा बैठकमा प्रश्न उठाएको हो।
प्रतिनिधि सभाको बैठकमा सचेतक सुशीला थिङले गृहमन्त्री लामिछानेको योग्यतामा प्रश्न उठाएकी हुन्। बुधबार प्रतिनिधि सभाको बैठक सुरु हुनासाथ नेपाली कांग्रेसका सांसदहरु आ–आफ्नो स्थानबाट उठेका थिए।
त्यसपछि सभामुख देवराज घिमिरेले नेपाली कांग्रेसका सचेतक सुशीला थिङलाई बोल्ने समय दिएका थिए। उनले उथलपुथल ल्याउँछु भन्ने प्रधानमन्त्री प्रचण्डले सहकारी ठगीमा मुछिएका व्यक्तिलाई गृहमन्त्री नियुक्त गरेको भन्दै आलोचना गरिन्।
उनले भनिन्,‘उहाँले (प्रधानमन्त्री प्रचण्ड) ले कसरी मन्त्रीहरु ल्याउनु भएछ भने सहकारी ठगीमा जोडिएका,पोखरा महानगरपालिकाले प्रतिवेदन दिएर अनुसन्धानमा रहेकालाई गृहमन्त्रीमा ल्याउनु भएछ, साँच्चिकै उहाँले उथलपुथल गरेर ल्याउनु भएछ।’
प्रचण्डले काँग्रेससँगको सत्ता गठबन्धन तोडेर एमाले र रास्वपालाई समेत समेटेर मन्त्रीमण्डल गठन गरेका थिए। प्रधानमन्त्री प्रचण्डले रास्वपा सभापति लामिछानेलाई उपप्रधानमन्त्री एवम् गृहमन्त्री नियुक्त गरेका थिए।
थिङले अब सहकारी ठगी प्रकरणमा अनुसन्धान होला कि नहोला भनेर प्रश्न गरिन्।
