काठमाडाैं । कीर्तिपुर नगरपालिका क्षेत्रमा रहेका दुई वटा प्राचिन पोखरीहरु व्यक्तिको नाममा दर्ता गरेको खुलासा भएको छ ।
व्यक्तिको नाममा दर्ता भए पनि अहिलेसम्म भोग चलन नभएको ती पोखरी जोगाउन स्थानीय बासिन्दा अहिले कस्सिएका छन् । प्राचिन पोखरीहरु सैन्य सुरक्षात्मक र भूमिगत जल प्रणाली सहितको कीर्तिपुरको नगर सभ्यताको गौरवंशाली पहिचान थिए । तर, समयक्रमसँगै यस्ता ऐतिहासिक पोखरीहरु विभिन्न कारणले नासिएर अस्तित्व नै समाप्त भईसकेको छ । भएका पोखरीहरुको पनि उचित संरक्षण हुन सकेको छैन ।
कीर्तिपुर नगरपालिका वडा नं ५ मा रहेका दुई वटा सार्वजनिक पोखरी समेत व्यक्तिको नाममा दर्ता भएको पाईएको छ । च्वय् दहन र क्वय् दहन नाम गरेका यी सार्वजनिक पोखरीहरु व्यक्तिको नाममा २०२४ सालमा नै ब्यक्तिको नाममा दर्ता भएको खुलासा भएको हो । नापी श्रेस्तामा समेत सार्वजनिक पोखरीहरु देखिने यी पोखरीहरु तत्कालिन भूमिसुधार राज्य मन्त्रीको तोक आदेशमा चोभारका तत्कालिन सहसेनानी हर्षजगं कार्कीको नाममा दर्ता भएको थियो । दर्ता भए पनि पोखरीहरुको भोग चलन भने कार्की परिवारले गरेको छैन तर हक हस्तान्तरण भने हुदै आएको पाइएको छ ।
२०७६ सालमा सरकारी सार्वजनिक र गुथी जग्गा संरक्षण सम्बन्धि जाँचबुझ आयोगमा यस विषयमा उजुरी समेत परेको थियो । च्वय् दहन ५ रोपनी र क्वय् दहन ७ रोपनी भन्दा बढी रहेकाले भूमाफियाहरु अहिले यी पोखरी हत्याउन अनेकौं तिकडम गरिरहेको स्थानीयले बताएका छन् । अहिले त झन बाटो ११ मिटर मापदण्ड कायम गरेको एक पक्षयी रुपमा च्वय् दहन पोखरी मात्र मिचेर कंक्रीट संरचना निमार्ण गरिरहेको छ । सार्वजनिक पोखरी संरक्षण समितिका संयोजक बैकुण्ठ महर्जन यी पोखरीहरु बचाउन पहल गरिरहेको दाबी गर्नुहुन्छ इमेज खबरमा समाचार छ । -नरेन्द्र मानन्धर
