काठमाडौं । उपप्रधान एवम् गृहमन्त्री रवि लामिछानेले गैरकानुनी गर्ने जो कोही भए पनि कारवाही गर्न प्रहरी प्रशासनलाई अपिल गरेका छन् ।
मंगलबार बिहान सामाजिक सञ्जालमा लेख्दै उनले देशको जुनसुकै भू-भागमा गैरकानुनी गर्ने वा गैरकानुनी कामधन्दा चलाएको जो कोहीलाई कारवाही गर्न निर्देशन दिएका हुन्।
साथै, यही फागुन २३ गते गृहमन्त्रीको पदवहाली गरेका लामिछानेले गैरकानुनी खालका काम गर्नेहरूलाई कारवाही गर्नका लागि आफ्नो आदेश कुर्नु नपर्नेसमेत जनाएका छन्।
‘देश भरका सम्पूर्ण राष्ट्रसेवक प्रहरीहरूलाई मेरो अपिल’ भन्दै फेसबुकमा उनले लेखेका छन्, ‘देशको कुनै पनि भागमा कुनैपनि ब्यक्ति वा समूहले गैरकानुनी काम गरेको छ। गैरकानुनी धन्दा चलाएको छ। कर छली गरेको छ, गुण्डागर्दी, धाक(धम्की, तस्करी लगायतका अपराध गरेको छ भने त्यसलाई कारवाही गर्न मेरो वा कसैको आदेश कुर्नु पर्दैन। ऐन पल्टाउनुस् र देखाइदिनुस् कानुनी राज्य भनेको के हो। तपाईंले मलाई होइन, मैले तपाईंलाई सलाम गर्ने गरी काम गर्नूहोस्। मेरो शुभकामना छ। जय नेपाल ! पार्टी वाला होइन, देश वाला !!’
यसअघि पनि निकै छोटो समायका लागि गृहमन्त्री बनेका लामिछाने नागरिकता प्रकरणका कारण पदच्युत भएका थिए। त्यसपछि नयाँ नागरिकता बनाएर चितवन-२ मा भएको उपनिर्वाचनमा लोकप्रिय मतका साथ विजयी भएर संसद् प्रवेश गरे। दोस्रो पटक गृहमन्त्रीको पदवहाली गरेसँगै रविले मिटरब्याज र सहकारी पीडितको समस्या समाधान गर्नु आफ्नो लागि ठूलो चुनौती रहेको बताएका थिए।
प्रधानमन्त्री दाहालले बुधबार गरेको मन्त्रिपरिषद विस्तारअनुसार २२ सदस्यीय मन्त्रिमण्डल बनेको छ। जसमा एमालेका ८, माओवादीका आफूसहित ६, रास्वपाका ४, नेकपा एकीकृत समाजवादीका २ र जनता समाजवादी पार्टी (जसपा) नेपालका २ गरी २२ सदस्यीय मन्त्रिमण्डल बनाएका हुन्।
हाल मुलुकको उपप्रधानमन्त्रीमा रविसहित चार जना रहेका छन्। स्वास्थ्यमन्त्रीसमेत रहेका जसमा जसपाका उपेन्द्र यादव परराष्ट्रमन्त्रीसमेत रहेका माओवादीका नारायणकाजी श्रेष्ठ र भौतिक पूर्वाधारमन्त्रीसमेत रहेका एमालेका रघुवीर महासेठ रहेका छन्।
