काठमाडौं। नेपाली कांग्रेसका उपसभापति धनराज गुरूङले कांग्रेसबाट निर्वाचित भएका वडा अध्यक्षदेखि मन्त्रीसम्मको सम्पत्ति छानबिन गरेर जानुपर्ने विषय महासमिति बैठकले पारित गर्नुपर्ने जनाएका छन्।
ललितपुरको गोदावरीमा सोमबारबाट सुरू भएको महासमिति बैठकमा बोल्दै उनले यस्तो प्रस्ताव राखेका हुन्। साथै उनले पदाधिकारीले गरेका गल्तीहरूलाई महासमितिले सच्याएर अघि बढ्नुपर्ने जनाए । यस्तै पार्टीको सांगठनिक संरचना सुधार गर्ने महासमितिले अधिकार राख्ने भन्दै उपसभापति गुरुङले भने, ‘भद्दा संरचनालाई हटाएर चुस्त बनाउनुपर्छ । मुसाले धेरै बच्चा जन्माउँछ। हात्तीले एउटा जन्माउँछ तर, त्यही शक्तिशाली हुन्छ।’ काँग्रेसमा फेदमा बस्नेले दुख गर्ने टुप्पोमा बस्नेले मात्रै खाने परिपाटीको अन्त्य गर्नुपर्ने आवश्यकता औँल्याए। ‘हामी एक ठाउँमा उभिएर आर्थिक सुशासन कायम गर्नुपर्ने छ। यो हुन नसक्नु भनेको भ्रष्टचार मौलाउनु हो।
जबसम्म भूँइमा भएकालाई टुप्पोमा पुर्याउन सकिँदैन तबसम्म केही गर्न सकिदैन,’ उनले भने। उपसभापति गुरूङले आर्थिक,सामाजिक, अन्तर्राष्ट्रिय लगायत नीतिहरू बैठकमा प्रस्तुत हुने भन्दै आर्थिक नीति प्रजातन्त्र समाजवाद हुनुपर्ने र झु्पडी र महलमा बस्नेलाई जोड्ने भनेको प्रजातान्त्रिक समाजवादले नै भएको जिकिर गरे। ‘कोरोनाका कारण अस्ताएको अर्थतन्त्र बिस्तारै सकारात्मक दिशामा अघि बढिरहेको छ।
परिवर्तन अझै ह्वात्तै फड्को मार्न सकिएको छैन, यसमा क्रोनी क्यापिटालिजम्ले हो कि भन्ने विषयमा बहस गरपनुपर्दछ। क्रोनी क्यापिटालिज्मका कारण आर्थिक सुशासन कायम गर्न सकिएको छैन। यसका विरुद्धमा महासमितिले एकमत भएर उभिएर समाधान लगेर जानुपर्दछ’, उपसभापति गुरुङले भने। यसअघि बैठकको उद्घाटन गर्दै कांग्रेस सभापति शेरबहादुर देउवाले आवश्यकताअनुसार संविधान संशोधनको प्रस्ताव अघि बढाउनुपर्ने जनाएका थिए। संविधानले जारी गरेको शासकीय स्वरुपको मूलभूत विषयमा प्रभाव नपर्ने गरी संविधान संशोधनको लागि छलफल गर्न देउवाले प्रस्ताव गरेका हुन्। उनले सत्ता गठबन्धन संविधान रक्षाको लागि गरेको कारण राजनीतिक स्थिरताको लागि यसको निरन्तरता जरुरी रहेको पनि जनाए।
त्यस्तै, भविष्यमा गठबन्धन गर्ने वा नगर्ने भन्ने सन्दर्भमा पार्टीले तत्कालको राजनीतिक औचित्य र सान्दर्भिकताका आधारमा तय गर्ने पनि उनले जनाए।
देउवाले महामन्त्री गगन थापाको प्रस्तावविपरीत गठबन्धन अहिलेको आवश्यकता भएको औँल्याएका थिए। यसअघि गठबन्धनका विषयबारे देउवा निवास बुढानिलकण्ठमा महामन्त्री गगन थापासहित बैठकमा बसेका थिए। महामन्त्री थापा गठबन्धनको विपक्षमा भए पनि सभापति देउवाले भने गठबन्धनको आवश्यकता रहेको जिकिर गर्दै आएका छन्।
देउवा निवास बुढानिलकण्ठमा भएको बैठक निष्कर्षविहीन भएको थियो। महासमिति बैठकको उद्घाटनपछि महामन्त्रीसहितको छलफल फेरि सुचारु गर्ने बताइएको छ।
