काठमाडौं । नेकपा (एमाले) का अध्यक्ष केपी शर्मा ओलीले असफल भइसकेका मानिसलाई उपकुलपति बनाउने खेल भइरहेको बताएका छन्।
एमाले निकट काठमाडौं सहकारी सञ्चालकहरूको भेलामा सोमबार बोल्दै उनले भागबन्डा नगर्ने भनेर प्रधानमन्त्रीले एकलौटी गर्न लागेको बताएका हुन्। ‘अहिले त नयाँ तरिका छ– भागबन्डा नगर्ने एकलौटी गर्ने,’ उनले भने, ‘मेरिटोक्रेसीका आधारमा लिने, एउटा छानबिन समिति बनाउने, यताउति गर्ने, एउटा असफलसिद्ध भइसकेका मानिसहरूको छनोट गर्ने, अहिले तीन जना सिफारिस भएको छ क्यारे, तीनजनामा तेस्रोचाहिँ नियुक्त होलान् जस्तो लाग्छ, छाँटकाँट हेर्दा, किनभने अलि बढ्दै अससफल भएको मानिस चाहियो नि! त्यसो भएर तृतीय नम्बरचाहिँ नियुक्त हुनुहोला कि जस्तो अनुमान हो मेरो! नहुन पनि सक्छ!,’ उनले भने। उनले सत्तामा बस्नेसँग प्रजातान्त्रिक आचरण, व्यवहार र अभ्यास नभएको पनि बताए।
त्रिभुवन विश्वविद्यालयको उपकुलपति नियुक्तिका लागि तीन जनाको नाम सिफारिस गरिएको छ। प्रा. डा. चित्रबहादुर बुढाथोकी, प्रा. डा. केशरजंग बराल र प्रा. डा. टंकनाथ धमलाको नाम उपकुलपतिका लागि सिफारिस भएको छ।
सहकुलपति समेत रहेका शिक्षामन्त्री अशोक राई नेतृत्वको उपकुलपति छनोट तथा सिफारिस समितिले नाम सिफारिस गरेको शिक्षा विज्ञान तथा प्रविधि मन्त्रालयले जनाएको छ। उपकुलपतिका लागि ४३ जनाले आवेदन दिएकामा ‘सर्टलिस्ट’ मा १४ जना परेका थिए। तीमध्ये तीन जनाको नाम कुलपति समेत रहेका प्रधानमन्त्री पुष्पकमल दाहाल ’प्रचण्ड’ लाई आइतबार सिफारिस गरिएको हो।
चित्रबहादुर बुढाथोकी त्रिवि शिक्षा संकायका डिन हुन् भने, केशरजंग बराल पोखरा विश्वविद्यालयका पूर्वउपकुलपति र टंकनाथ धमला त्रिवि गणित विभागका प्रमुख हुन्।
