वीरगञ्ज । दुई दशकदेखि बन्द अवस्थामा रहेको वीरगञ्ज चिनी काराखानाको अतिक्रमित जग्गा र बाँडिएको जग्गा खोजिने भएको छ। बन्द अवस्थामा रहेको चिनी काराखनाको जग्गा पछिल्लो समय अतिक्रमणमा परेको तथा विभिन्न निकायलाई बाँडिएकोले कारखानाको अतिक्रमित जग्गासँगै बाँडिएको जग्गा पनि खोजिने जनाइएको छ।
संसदको उद्योग तथा वाणिज्य र श्रम तथा उपभोक्ता हित समितिअन्तर्गतको चिनी उद्योग तथा उखु किसानहरूका समस्या समाधान र सुझाव उपसमितिले वीरगञ्ज चिनी कारखानको अवलोकन गर्दै यस्तो जानकारी प्राप्त भएकाे हाे । वि.सं. २०५९ साल फागुन १६ गते मन्त्रिपरिषदको निर्णयले चालु अवस्थामा रहेको वीरगञ्ज चिनी कारखानालाई बन्द गर्ने निर्णय गरेको थियो। सोही बेलादेखि बन्द रहेको चिनी कारखानाको जग्गा विभिन्न सरकारी निकायलाई दिइएको छ भने केही जग्गाहरु अतिक्रमणमा पनि परेको छ।
संसदीय टोलीले अवलोकनको क्रममा कारखानामा रहेको मेशिन रसियन मेशिन भएको तथा त्यसबेलाको फलामको क्वालिटी र मेशिनको क्वालिटी बलियो भएकाले कारखानालाई लाई फेरि सञ्चालन गर्न सकिने जानकारी दिएको छ। वीरगञ्ज चिनी काराखानाको बारेमा बाहिर चलेको हल्ला गलत भएको तथा वीरगञ्ज चिनी कारखानालाई चलाउन सकिन्छ भन्ने राय अब आफूहरुले दिने उपसमितिका संयोजक एवं बारा–४ का सांसद किसान श्रेष्ठले जनाए ।
काठमाडौं गएर वीरगञ्ज चिनी कारखानाको सम्पति के कस्तो अवस्थामा छ भन्ने बुझ्ने कोशिस गर्ने उनले जनाए। ‘कतै सशस्त्र प्रहरीले लिएको छ, कतै अदालतले लिएको छ, त्यो त बेहाल छ नि,’ उनले भने, ‘यस विषयमा उपसमितिले वीरगञ्ज चिनी काराखानाको सम्पति के कति छ कस्तो अवस्थामा छ त्यो पनि हामी खौज्छौँ।’
वीरगञ्ज चिनी कारखानासहित मधेस प्रदेशको रौतहटस्थित बन्द अवस्थामा रहेको श्रीराम सुगर उद्योग, चालु अवस्थामा रहेको बारा, सर्लाहीको चिनी उद्योगको पनि आफूहरुले अनुगमन गरिरहेको श्रेष्ठको धारणा छ।
वीरगञ्ज चिनी कारखानाको जग्गामध्ये सशस्त्र प्रहरी बल १३ नम्बर गण पर्सालाई ६ विगाह १० धुर, उच्च अदालत जनकपुर अस्थायी इजलास वीरगञ्जलाई दुई विगाह, उच्च सरकारी वकिलको कार्यालयलाई एक विगाह र कोष तथा लेखा नियन्त्रक कार्यालय पर्सालाई एक विगाह जग्गा विभिन्न समयमा दिइएको छ।
दुई दशकदेखि बन्द अवस्थामा रहेको वीरगञ्ज चिनी उद्योगलाई चलाउन सकिने तर बजारमा चल्न सक्दैन भनेर गलत हल्ला फैलाइएको किसान हकहित संघर्ष समिति पर्साका अध्यक्ष सहरुम गदीले जनाए ।
सरकारको नियत चलाउन सक्ने भए बन्द चिनी कारखाना चलाउन सकिने तर सरकारकै नियत नभएकोले लामो समयदेखि वीरगञ्ज चिनी कारखाना बन्द अवस्थामा रहेको उखु उत्पादक किसान संघ पर्साका अध्यक्ष असर्फी साहको भनाइ छ। अहिले बन्द रहेको चिनी कारखाना खण्डहरमा परिणत हुँदै गएको छ। त्यहाँ रहेका भौतिक संरचना र करोडौँका सवारीसाधन दिनप्रतिदिन जिर्ण बन्दै गइरहेका छन्।
