काठमाडौं / नेपाल प्रहरीको केन्द्रीय अनुसन्धान ब्युरो (सीआईबी) ले राष्ट्रिय स्वतन्त्र पार्टीका अध्यक्ष रवि लामिछाने तथा ग्यालेक्सी फोरके टिभीका सञ्चालक गितेन्द्रबाबु (जिबी) राई जोडिएको सहकारी घोटाला प्रकरणमा छानबिन सुरु गरेको छ।
उपप्रधान तथा गृहमन्त्री नारायणकाजी श्रेष्ठको निर्देशनपछि सीआईबीले यस प्रकरणमा अनुसन्धान सुरु गरेको हो। पुस १६ गतेको राज्यव्यवस्था तथा सुशासन समितिको बैठकमा गृहमन्त्री श्रेष्ठबिरुद्ध आक्रामक रुपमा प्रस्तुत भएका लामिछानेलाई जवाफ दिने क्रममा श्रेष्ठले सहकारी घोटाला प्रकरणमा रविबिरुद्ध अनुसन्धान अघि बढ्नसक्ने संकेत गरेका थिए।
गृहमन्त्री श्रेष्ठले सीआईबीका निर्देशक तथा एआईजी किरण वज्राचार्यलाई रवि-जिबी सहकारी प्रकरणमा अनुसन्धान गर्न निर्देशन गरेका थिए।
सोही निर्देशनबमोजिम सीआईबीले अनुसन्धान अघि बढाएको हो।
सहकारी प्रकरणमा सम्बन्धित जिल्ला प्रहरी कार्यालयले भने अनुसन्धान अघि बढाइसकेका छन्। सोही अनुसन्धानका फाइल सीआईबीले तानेर अनुसन्धान अघि बढाएको सीआईबीका एक उच्च अधिकारीले जानकारी दिए।
