काठमाडौं / आइसीसी यू-१९ विश्वकप अन्तर्गत आफ्नो पहिलो खेलमा नेपाल न्युजिल्यान्डसँग ६४ रनले पराजित भएको छ। नेपाल यू-१९ विश्वकप इतिहासमा पहिलो पटक न्युजिल्यान्डसँग पराजित भएको हो। आइतबार भएको खेलमा नेपाल न्युजिल्यान्डसँग पुरै ५० ओभर ब्याटिङ गरेपनि न्युजिल्यान्डले दिएको ३ सय ३ रनको उच्च लक्ष्य भेटाउन भने सकेन।
यसअघि नेपालले २००६ र २०१६ मा न्युजिल्यान्डलाई हराउँदै सनसनि मच्चाएको थियो। टस हारेर पहिले ब्याटिङ गरेको न्युजिल्यान्डले दिएको ३ सय ३ रनको लक्ष्य पछ्याएको नेपालले पुरै ५० ओभर खेल्दै ९ विकेट गुमाएर २ सय ३८ रन बनायो। नेपालका लागि अर्जुन कुमालले सानदार ब्याटिङ गर्दै ९० रन बनाएका थिए। उनले १०४ बल खेल्दै १२ चौकाको सहयोगमा राम्रो इनिङ खेलेपनि उनले गतिलो साथ पाउन सकेनन्।
नेपालका लागि थप दोहोरो रनको स्कोरका रुपमा कप्तान देव खनालले ३६ रन बनाउँदा दिपक बोहराले १५ रन बनाए। भने आकाश चन्द १४ रनमा आउट भए। पुरै ओभर टिकाउने क्रममा नेपालका सुभाष भण्डारी ३३ तथा तिलक भण्डारी १७ रनमा अविजित फर्किए। न्युजिल्यान्डका लागि मसोन क्लार्कले ३ विकेट लिएका थिए। त्यस्तै एवाल्ड स्रेयुडर र ओस्कार ज्याक्सनले २-२ विकेट लिए। त्यस्तै म्याट रोइ, ज्याक कुमिङ्गले समान १-१ विकेट लिएका थिए।
त्यसअघि पहिले ब्याटिङ गरेको न्युजिल्यान्डले निर्धारित ५० ओभरमा ८ विकेट गुमाएर ३ सय २ रनको उच्च स्कोर बनाएको थियो। एक समयमा ६७ रन जोड्दा तीन विकेट लिएको नेपाल त्यसपछि भने ‘ब्याग फुट’ मा धकेलियो। क्रिजमा रहेका स्नेहिथ रेड्डी र कप्तान ओस्कार ज्याक्सनले सानदार साझेदारी गर्दै न्युजिल्यान्डलाई उच्च स्कोरमा पुर्याउन सफल भएका थिए। यि दुईबिच चौथो विकेटका लागि १ सय ५७ रनको साझेदारी भएको थियो। कप्तान ज्याकसन ७५ रनमा आकाश त्रिपाठी द्वारा बोल्ड हुँदा साझेदारी तोडिएको थियो। तर न्युजिल्यान्डले त्यसपछि पनि विकेट पतन भएपनि उसले रन निरन्तर जोड्दा विशाल लक्ष्य बनाउन सफल भयो।
उसका लागि रेड्डीले १ सय २५ बल खेल्दै ११ चौका र ६ छक्काको सहयोगमा १ सय ४७ रनको नटआउट इनिङ खेले। त्यस्तै ज्याकसनले ८१ बलमा ७५ रन बनाए। थप दोहोरो स्कोरका रुपमा टोम जोनेसले ३३ रन बनाउँदा लुके वाट्सनले १४ रन बनाए। त्यस्तै एलेक्स थोम्सनले १३ रन बनाएका थिए। अन्य खेलाडीले भने दोहोरो रनको स्कोर बनाएनन्।
नेपालका लागि सुभाष भण्डारीले ३ विकेट लिंदा गुल्सन झाले २ विकेट लिए। त्यस्तै दिपेश कँडेल, तिलक भण्डारी र आकाश त्रिपाठीको नाममा समान १-१ विकेट रह्यो।
