काठमाडौं । सरकारले माइतीघर मण्डलालाई निषेधित क्षेत्र तोकेको विरोधमा प्रदर्शन गरिएको छ। बृहत् नागरिक आन्दोलनको ब्यानरमा शनिबार बबरमहलस्थित नेपाल कला परिषद्अघि प्रदर्शन गरिएको हो। विभिन्न समूहले आफ्ना माग राखी प्रदर्शन गर्दै आएको माइतीघर मण्डला क्षेत्रलाई सरकारले केही महिनायता निषेधित क्षेत्र घोषणा गरेको छ। त्यसको विरोधमा सोही क्षेत्रमा प्रदर्शन गर्नेहरूलाई पक्राउ गर्ने गरेको छ।
शनिबारका प्रदर्शनकारीले ‘लोकतान्त्रिक स्थानको संकुचन नगर’, ‘लोकतान्त्रिक स्थानलाई नखुम्च्याऊ’, ‘माइतीघरको निषेधाज्ञा खारेज गर’, ‘माइतीघरको निषेधाज्ञा तत्काल फिर्ता गर” लगायतका नारायुक्त पम्प्लेट प्रस्तुत गरेका थिए।
प्रदर्शनमा सहभागी नवीन तिवारीले लोकतन्त्रमा विरोध गर्न पाइने भए पनि अहिलेको सरकारले विरोध गर्ने ठाउँ खुम्च्याउदै लगेकाले आफूले विरोध गर्नुपरेको बताए। ‘हिजो खड्गप्रसाद|ओलीले संसद् विघटन गर्दा त्यसको विरोध गर्न अहिलेका प्रधानमन्त्री पुष्पकमल दाहाललाई समेत यही माइतीघर मण्डला चाहिएको थियो’, तिवारीले भने, ‘अहिले उनी आफैं सरकार प्रमुख छन् तर हिजो आफैंले विरोध प्रदर्शन गरेको स्थान माइतीघर मण्डलालाई निषेधित क्षेत्र तोकेका छन्। यो आफैंमा अलोकतान्त्रिक चरित्र हो। हामीले यसैको विरोध गरेका हौँ।’
