काठमाडाैं । नेकपा माओवादी केन्द्रका प्रवक्ता अग्निप्रसाद सापकोटाले चार महिनासम्म चलेको ‘जनतासँग माओवादी, विशेष रूपान्तरण अभियान’ ले पार्टीमा जागृति र जनतामा आशा पलाएको जनाएका छन्।
यो अभियान सोमबार सकिएको थियो। अभियानअन्तर्गत नेताहरू गाउँ-गाउँ पुगेका थिए। पार्टीले निर्धारण गरेको लक्ष्य र उद्देश्यमा अभियान सफल भएको सापकोटाले जनाए ।
केन्द्रीय कार्यालय पेरिसडाँडामा मंगलबार पत्रकार सम्मेलन गर्दै सापकोटाले भने, ‘यो अभियानले पार्टी कमिटी चलायमान भएको छ। कार्यकर्तामा जागृति र जनतामा आशा पलाएको छ।’ माओवादी चुनावमा मात्र होइन अरूबेला पनि गाउँ आएको भन्दै जनतामा आशाको झिल्का देखिएको उनले दाबी गरेका छन्।
‘यो अभियानले बनेका संगठनलाई सक्रिय बनायो भने कमिटी नै नभएका ठाउँमा गठन गरिएको छ,’ सापकोटाले भने, ‘पुराना कार्यकर्ता पनि पार्टीमा जोडिएका छन् भने पार्टी प्रवेश पनि बढेको छ।’ उनले पार्टी एकढिक्का भएको र आशा उत्पन्न भएको बताए। पार्टी सदस्यता नवीकरणलाई पनि तीव्रता दिइएको उनले बताए। ‘कतिपय पालिकामा वडा सम्मेलन पनि भइरहेका छन्,’ उनले भने।
कार्यकर्ताले विधान र नियमावलीअनुसार पार्टी चल्नुपर्ने सुझावसमेत दिएको उनको धारणा छ। ‘आन्तरिक निर्देशन दिइएको छ तर सबैभन्दा पहिले त माथिबाट नै पालना हुनुपर्छ भन्ने सुझाव कार्यकर्ताका छन्,’ सापकोटाले भने, ‘पार्टीलाई नयाँ ढंगले अघि बढ्न निकै राम्रा सुझाव आएका छन्। पालिकादेखि नै प्रतिवेदन तयार भइरहेका छन् ती केन्द्रमा आउँछ। केन्द्रीय कमिटी लगायतमा समीक्षा गरेर निस्कर्ष निकाल्छौं।’
कार्यकर्ताहरूले पक्षधरता र पहिचानका कुरा पनि जोड दिएर उठाउने गरेको उनले जनाए। सरकारले सुरू गरेका भ्रष्टाचारविरोधी अभियानलाई अझै गम्भीरतापूर्वक अघि बढाउन पनि सुझाव आएको उनको धारणा छ।
