प्रधानमन्त्री पुष्पकमल दाहाल प्रचण्ड नेतृत्वको सरकार गठन भएको एक वर्ष पुग्न लागेको छ । तर, यस अवधिमा सरकारका गतिविधिबाट भने जनता सन्तुष्ट छैनन् । यही क्रममा सरकारकी सञ्चार तथा सूचना प्रविधि मन्त्री रेखा शर्माले एक सार्वजनिक कार्यक्रममा सुशासन प्रवद्र्धन एवं सेवा प्रवाहलाई सरकारले प्राथमिकतामा राखेर काम गरिरहेको दाबी गरेकी छन् । उनले लोकतन्त्रमा अभिव्यक्तिको स्वतन्त्रता भए पनि संविधानको मर्मविपरीत बोल्ने छुट कसैलाई नभएको पनि जनाइन् ।
मन्त्री शर्माले यसो भन्दै गर्दा सरकारले संविधानको मर्म, जनयुद्धको लक्ष्य र जनअपेक्षाअनुसार कति काम गर्न सक्यो भन्ने आत्मसमीक्षा गर्न आवश्यक देखिन्छन् । हाल माओवादी केन्द्रको नेतृत्वमा सरकार छ । यही माओवादीले ५० को दशकमा देशमा किसान, मजदूर र समाजका अल्पसंख्यक, सीमान्तीकृतका लागि युद्धको घोषणा गरेको थियो । सामन्तवादको अन्त्य, जनताको सरकार र स्वाधीन तथा सार्वभौमराष्ट्रको परिकल्पना गरिएको थियो । तर, पूँजीवादको विरोध गर्ने र समाजवादलाई आफ्नो गन्तव्यमा ठान्ने माओवादी पार्टी अहिले तिनै पूँजीपतिको प्रभावमा परेको छ । यसका नेताहरु नवधनाढ्यको रुपमा उदाएका छन् । यसले जनयुद्धको मर्मलाई माओवादी पार्टी स्वयंले बुझ्न नसकेको स्पष्ट हुन्छ ।
अर्कोतर्फ हाम्रो संविधानमा पनि समाजवादलाई गन्तव्य मानिएको छ । सरकारमा पनि कम्युनिष्ट दलको नेतृत्व छ । तर, अहिले पनि सामान्य आय भएका श्रमिक, मजदूरले साँझबिहान हातमुख जोड्नै सकस छ । किसानले आफ्नो उत्पादनको राम्रो भाउ पाउन सकेका छैनन् । बजारमा बिचौलियाको बिगबिगी छ । शिक्षा, स्वास्थ्य, बैंक तथा वित्तीय क्षेत्रमा चरम लूट छ । तर, सरकार यी समस्या समाधान गर्न भने सफल हुन सकिरहेको छैन । संविधानको मर्मलाई पनि वर्तमान सरकारले आत्मसात् गर्न सकेको छैन ।
देशमा अहिले पनि जनयुद्धकालको संक्रमणकालीन न्यायसम्बन्धी मुद्दाको टुंगा लाग्न सकेको छैन । रोजगारीको अभावका कारण ठूलो संख्यामा युवा विदेश पलायन भइरहेका छन् । अध्ययन वा अन्य बहानामा विदेश गएका नेपाली पनि यहाँ सम्भावना नदेखेर उतै स्थायी बसोबास गर्न थालेका छन् । अर्थतन्त्र संकटग्रस्त छ । विप्रेषणमा आधारित अर्थतन्त्र भएकाले त्यसमा समस्या आउनेबित्तिकै देशको अर्थतन्त्र पनि धराशायी हुने निश्चितप्रायः छ । जनताको अपेक्षा देशको अस्थिर राजनीतिको अन्त्य र विकास निर्माण छ । रोजगारी सृजना र लगानीको वातावरणको छ । तर, सरकार त्यही जनअपेक्षा पनि पूरा गर्न सक्ने अवस्थामा छैन । यसबीचमा निश्चित नेता तथा तिनका परिवार र आसेपासेको भने ठूलो प्रगति भएको छ । जनताको अवस्था ज्यूँका त्यूँ नै छ । यही कारण जनताले पुराना राजनीतिक दलप्रति भरोसा गरेका छन् । त्यसैले विशेषगरी माओवादी, जो अहिले सत्तामा छ, उक्त पार्टीले संविधानको मर्म, जनयुद्ध र जनअपेक्षालाई बुझ्न जरुरी छ । विगतमा गरिएका प्रतिबद्धतालाई पूरा गर्न र देशमा विकास निर्माणको वातावरण सृजना गर्नेमा प्रचण्डलगायतले जोड दिन आवश्यक छ । केवल भाषणबाजीमा मात्र होइन, काममा पनि सरकारले आफ्नो तदारुकता देखाउन सके जनअपेक्षा पूरा हुने थियो । जनधारणा साप्ताहिक
