काठमाडौं । प्रधानमन्त्री कप राष्ट्रिय महिला टी–२० क्रिकेट प्रतियोगितामा विभागिय क्लब एपिएफले आफ्नो अपराजित यात्रा चौंथो खेलमा पनि जारी राखेको छ। सोमबार भएको खेलमा एपिएफले तीन खेलसम्म अपराजित रहेको कोशी प्रदेशलाई ८ विकेटले पराजित गर्दै प्रतियोगितामा आफ्नो लगातार जित यात्रा जारी राख्यो। सोमबारनै लगातार ३ खेलमा पराजित भएको मधेशले आफ्नो पहिलो जित निकाल्ने क्रममा गण्डकी प्रदेशलाई २७ रनले हरायो।
प्रतियोगिता अन्तर्गतनै भएको अर्को खेलमा लुम्बिनी प्रदेशले कर्णाली प्रदेशलाई ३० रनले हरायो। कर्णालीको यो लगातार चौंथो हार हो। त्यस्तै सुदुरपश्चिम प्रदेशले बागमतीमाथी ६ विकेटको जित निकाल्दा सहभागि सबै ८ टिमले ४ खेल पुरा गरेका छन्।
सोमबार टियू मैदान कीर्तिपुरमा भएको पहिलो खेलमा लुम्बिनीले पहिले ब्याटिङ गर्दै निर्धारित २० ओभरमा ५ विकेट गुमाएर १ सय ३३ रन बनाएको थियो। उसका लागि कप्तान सरस्वती जिएमले ५३ रनको अर्धशतकीय इनिङ खेल्दा आश्मा पुलामी मगरले २५ तथा चमेली चौधरीले १८ रन बनाएकी थिइन्। जवाफमा कर्णाली प्रदेश निर्धारति २० ओभरमा ७ विकेट गुमाएर १ सय ३ रनमा समेटियो। उसका लागि गौरी बोहराले २२ र यमुना थारुले २१ रन बनाउनु सर्वाधिक रह्यो।
त्यस्तै कीर्तिपुर मैदानमानै भएको अर्को खेलमा बागमती प्रदेशलाई सुदुरपश्चिमले ६ विकेटले हरायो। बागमतीले पहिले ब्याटिङ गर्दै ८७ रन बनाएको थियो। जवाफमा उक्त लक्ष्य सुदुरपश्चिमले १९ ओभरमा ४ विकेट गुमाएर पुरा गर्याे। सुदूरको जितमा विन्दु रावलले २८ रन बनाउँदा कविता जोशी २७ रनमा अविजित रहिन।
त्यस्तै मुलपानि मैदानमा भएको दिनको पहिलो खेलमा मधेशले गण्डकीलाई पराजित गर्दै पहिलो जित निकाल्यो। पहिले ब्याटिङ गर्दै पुजा महतोको ३८ रन र सरस्वती कुमारीको २६ रनको नटआउट इनिङमा मधेशले निर्धारित २० ओभरमा ७ विकेट गुमाएर १ सय १२ रन बनाएको थियो। जवाफमा गण्डकी १९।४ ओभरमा ८५ रनमा अलआउट भयो। गण्डकीका लागि सुमन खतिवडाले ४२ रन बनाउनु सर्वाधिक रह्यो।
मूलपानीमै भएको दिनको दोस्रो खेलमा अङ्क तालिकाको शीर्ष स्थानमा रहेको एपिएफले अर्को अपराजित टिम बागमतिको निरन्तर जित यात्रा अन्त गर्यो। कोशीले पहिले ब्याटिङ गरदै निर्धारित २० ओभरमा २ विकेट गुमाएर ८४ रन बनाएको थियो। उसका लागि कप्तान रुविना क्षेत्रीले ४१ र काजल श्रेष्ठले २५ रनको नटआउट इनिङ खेल्दा अप्सरी बेगमले १३ रन बनाइन्। जवाफमा एपिएफले उक्ल लक्ष्य १५ बल बाँकी हुँदा २ विकेट गुमाएर पुरा गर्याे। एपिएफको जितमा इन्दु वर्मा ३६ रनमा नटआउट रहँदा कप्तान सिता रानामगरले १८ तथा ज्योति पाण्डेले २४ रन बनाइन्। त्यस्तै रोमा थापा १० रनमा अविजित रहिन्।
