काठमाडौं । सोमबार बिहान सिन्धुलीमा भएको सवारी दुर्घटनापछि अवरुद्ध भएको बीपी राजमार्ग सञ्चालनमा आएको छ।
बसले मोटरसाइकललाई ठक्कर दिँदा मोटरसाइकलमा सवार २ जनाको मृत्यु भएपछि स्थानीयले बसमा आगजनी गर्दै राजमार्ग अवरुद्ध गरेका थिए। बसमा लगाएको आगो निभाउँदै प्रहरीले सडक सञ्चालनमा ल्याएको हो।
अपराह्न १ बजेदेखि सडक पूर्ण रुपमा सञ्चालनमा आएको जिल्ला प्रहरी कार्यालय सिन्धुलीले जानकारी दिएको छ। रामेछापको मन्थलीबाट काठमाडौं जाँदै गरेको बागमती प्रदेश ०१–००६ ख ४५९३ नम्बरको अरनिको यातायात सेवा प्रालिको बसले सोमबार बिहान काठमाडौंबाट खुर्कोट जाँदै गरेको बा ६० प ३५४५ नम्बरको मोटरसाइकललाई ठक्कर दिएको थियो।
बसको ठक्करबाट मोटरसाइकलमा सवार खोटाङको दिक्तेल नगरपालिका– १० रुपाकोटकी १८ वर्षीया मुनाकला राईको घटनस्थलमै मृत्यु भएको थियो।
त्यसैगरी सो मोटरसाइकल चालक खोटाङ जिल्ला तुवाचुङ नगरपालिका–२ का कुमार राईको पनि उपचारका लागि स्थानीय खाल्टे अस्पतालमा लैजाँदै गर्दा बाटोमै मृत्यु भएको थियो। रामेछापको सुनकोशी गाउँपालिका–३ बोहोरेटारमा सो दुर्घटना भएको थियो।
प्रहरीले बसका चालक रामेछापको मन्थली नगरपालिका–१३ का २४ वर्षीय रूपेश अधिकारीलाई नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।
