काठमाडौं । काठमाडौं, गोकर्णेश्वर नगरपालिका-५ जोरपाटीमा ना.६ ख ७२८३ नम्बरको ट्रक र बा.५ ख २०० नम्बरको बसको बिचमा प्रदेश ३-०२-०१२ प ७३१७ नम्बरको मोटरसाइकल च्यापिएर बिहीबार दिउँसो दुर्घटना हुँदा मोटरसाइकल चालक सोही ठाउँ बस्ने भोजपुर टक्सार नगरपालिका-३ घर भएका ६३ वर्षीय निर्मल कुमार श्रेष्ठको मृत्यु भएको छ ।
दुर्घटनामा गम्भीर घाइते भएका उनको शंखरापुर अस्पतालमा उपचारको क्रममा मृत्यु भएको हो । ट्रक र बसका दुवै जना चालकलाई प्रहरीले नियन्त्रणमा लिएको छ । पाल्पा, रिप्दीकोट गाउँपालिका-२ लघुवास्थित सडकमा रा.१ ख २४०४ नम्बरको टिपर सडकबाट करिब १ सय ५० मिटर तल खसेर बिहीबार राति दुर्घटना हुँदा टिपरमा सवार रिब्दिकोट गाउँपालिका-३ बस्ने ३० वर्षीय विष्णु ढकालको मृत्यु भएको छ ।
दुर्घटनामा गम्भीर घाइते भएका उनको मिसन अस्पताल पाल्पामा उपचारको क्रममा मृत्यु भएको हो । साथै टिपरमा सवार २ जना घाइतेलाई लुम्बिनी मेडिकल कलेज प्रभासमा उपचारको लागि पठाइएको छ । टिपर चालकलाई प्रहरीले नियन्त्रणमा लिएको छ । कैलाली, धनगढी उपमहानगरपालिका-५ हसनपुरमा से.१ त ६२०४ नम्बरको ट्याक्टरको ठक्करबाट पैदलयात्री सोही उपमहानगरपालिका-५ भगवती टोल बस्ने दिवाकर भट्टको छोरी ५ वर्षीया सानबी भट्टको बिहीबार दिउँसो मृत्यु भएको छ ।
ठक्करबाट गम्भीर घाइते भएकी उनको निसर्ग अस्पताल धनगढीमा उपचारको क्रममा मृत्यु भएको हो । ट्याक्टर चालकलाई प्रहरीले नियन्त्रणमा लिएको छ । मकवानपुर, बागमती गाउँपालिका-८ साततले भन्ने स्थानमा बागमती प्रदेश ०३००२ प ३२६५ नम्बरको मोटरसाइकल अनियन्त्रित भई बिहीबार साँझ दुर्घटना हुँदा 3 चालक सोही ठाउँ बस्ने ४२ वर्षीय अमर पाख्रिनको मृत्यु भएको छ । दुर्घटनामा गम्भीर घाइते भएका उनको हेटौंडा अस्पतालमा उपचारको क्रममा मृत्यु भएको हो । यस सम्बन्धमा प्रहरीले थप अनुसन्धान गरिरहेको छ ।
