काठमाडौं । गत साता १८५८ अंकमा रहेर बन्द भएको सेयर बजार यो साता १८५२ अंकमा झरेको छ । आइतबार ७, सोमबार ४ र मंगलबार १० अंक घटेको बजार बुधबार ३ र बिहीबार १० अंकले बढ्यो । यो साताको पछिल्ला दुई दिन बजार सकारात्मक भएसँगै आगामी साता पनि त्यसले निरन्तरता पाउने अपेक्षा लगानीकर्ताको छ ।
गत साता ५ दिन खुलेको बजारमा कुल ७ अर्ब ३७ करोड रुपैयाँ बराबरको कारोबार भएको थियो । यो साता पनि ५ दिन खुलेको बजारमा ७ अर्ब ६२ करोड रुपैयाँ बराबरको कारोबार भयो । यो साता जीवन र निर्जीवन बीमा दुवै समूहले राम्रो प्रदर्शन गरे । ती दुई समूह २.२ प्रतिशतभन्दा धेरैले बढे । गत साता होटल तथा पर्यटन समूहले बजारमा राम्रो प्रदर्शन गरेको थियो । गत साता सो समूह २.७२ प्रतिशतले बढेको थियो भने यो साता २.१ प्रतिशत घटेको छ ।
बजारको शक्तिशाली समूह बैंकिङले लगातार खराब प्रदर्शन कायमै राखेको छ । यो समूह गत साता १.१९ प्रतिशत घटेकोमा यो साता ०.८६ प्रतिशत घटेको छ । यो साताको बुधबार बैंकिङ समूह विगत २९ महिनायताकै न्यूनतम विन्दु ११३३ अंकसम्म झर्यो ।
