काठमाडौं । सशस्त्र प्रहरी बलको नम्बर १ बाहिनी मुख्यालय पकलीले सीमा स्तम्भको मर्मत सम्भार सुरु गरेको छ।झापाको मेचीनगर नगरपालिका– ७ बाट सीमा स्तम्भ मर्मत गर्ने कार्य सुरु गरिएको छ।
सोमबार मुख्यालयका बाहिनीपति डीआईजी अन्जनीकुमार पोखरेल, नेपाल प्रहरीका कोशी प्रदेका डीआईजी राजेशनाथ बाँस्तोला र भारतीय सशस्त्र सीमा बल (एसएसबी) को संयुक्त उपस्थितिमा सीमाको मर्मत सम्भार सुरु गरिएको हो। एसएसबीका तर्फबाट कमान्डेन्ट नवीनकुमार राईको उपस्थिती थियो ।
यो अभियान अन्तर्गत सीमा स्तम्भको मर्मत सम्भार तथा रंगरोगन गर्नुका साथै हराएका सीमा स्तम्भको पहिचान गरेर सीमा स्तम्भ पुनर्निर्माण समेत गरिने बाहिनीपति पोखरेलले बताए।
यसअघि कात्तिक १६ गते मधेस प्रदेशस्थित सशस्त्र प्रहरी बल नेपाल नं २ छिन्नमस्ता बाहिनीले सीमाको मर्मत(सम्भार सुरु गरेको थियो। देशैभर सशस्त्र प्रहरी बलले सीमा मर्मत सम्भार सुरु गरेको छ।
नेपाल भारत बाउन्ड्री वर्किङ ग्रुप (बीडब्लूजी) को पाँचौं बैठकमा सन् २०१४ पश्चात् मर्मत तथा निर्माण भएका सीमा स्तम्भहरुमध्ये जोर नम्बरको सीमा स्तम्भहरु भारतीय सशस्त्र सीमा बल ९एसएसबी० ले सशस्त्र प्रहरी बल नेपालको उपस्थितिमा र बिजोर नम्बरको सीमा स्तम्भ नेपालले मर्मत सम्भार गर्ने निर्णय भएको थियो।
नेपाल सरकार मन्त्रिपरिषद्को २०७७ साउन १९ गतेको निर्णय अनुसार सन् २०१४ पश्चात् मर्मत तथा निर्माण भएका बिजोर सीमा स्तम्भहरु सशस्त्र प्रहरी बल नेपाललाई मर्मत सम्भार गर्ने जिम्मेवारी प्राप्त भए बमोजिम अहिले मर्मतको कार्य भइरहेको छ।
