काठमाडौं । पूर्वप्रधानन्यायाधीश कल्याणकुमार श्रेष्ठले शान्ति प्रक्रिया टुंगोमा नपुग्दा नेपाल द्वन्द्व पीडित देशमा वर्गीकृत हुनुपरेको बताएका छन्।
सोमबार काठमाडौंमा आयोजित एक कार्यक्रमलाई सम्बोधन गर्दै उनले यस्तो बताएका हुन्। उनले शान्ति प्रक्रियालाई टुंगोमा पुर्याउन अब कुनैपनि बहानामा ढिलाइ गर्न नहुने बताए। उनले विश्वमान चित्रमा नेपाललाई द्वन्द्व पीडित देशबाट शान्त्मिय देशमा बदल्नुपर्ने बताए। उनले पीडितलाई न्यायको प्रतिक्षा गराउनु नहुने बताए। शान्ति प्रक्रियाका बाँकी काम टुंगो लगाउन राष्ट्रिय प्रयास आवश्यक रहेको उनले बताएका हुन्।
जतिसुकै जनआन्दोलन भएपनि अन्याय दबाएर दिगो विकास र शान्ति स्थापना हुन नसक्ने उनले बताए। ‘यो देश हाम्रो शान्तिमय देशको रुपमा संसारको मानचित्रमा बसेको देश हो। केही समय हामी द्वन्द्व पीडित देशमा वर्गीकृत छौँ। विश्वमानचित्रमा द्वन्द्वपीडित राष्ट्रमा हामी चित्रित छौँ। यो शान्ति प्रक्रिया टुंगोमा नपुगेका कारणले यो चित्र हाम्रो निरन्तर छ। यो निरन्तर भएको चित्रलाई बदल्नुपर्छ।’ उनले भने,’ग्लोवल म्यापबाट हामीले द्वन्द्वपीडित राष्ट्र होइन, शान्तिमय देशको रुपमा बदल्नुपर्छ। यो जस सम्माननीय प्रधानमन्त्रीको कार्याकालमा होस्। पीडितलाई न्यायको प्रतिक्षा अब ढिलाइ हुन दिनु हुँदैन। यो समाधान गर्न सकिने विषय हो। राष्ट्रिय प्रयासबाट हुनसक्छ। हामीमा उर्जा, शासह, लगन र उदारतामा जरुरी छ।
राजनीतिक पाटोबाट उपलब्धि हासिल त भए, राजनीतिक वर्गले केही उपलब्धि त लिए, तर जतिसुकै जनआन्दोलन भएपनि त्यो जनआन्दोलन वा क्रान्तिमा भएका अपचारहरु, अन्यायहरु सहिदेउ भनेर पीडितलाई भन्ने अधिकार कसैलाई छैन। अन्याय सहन हुँदैन, सहन भन्नु हुँदैन। त्यो तर्जुमा गर्नसक्ने भनेको न्यायबाट हो।’ पूर्वप्रधानन्यायधीश श्रेष्ठले दिगो शान्ति ल्याउन न्यायिक आधारमा सुदृढ गर्नुपर्ने बताए। उनले न्यायलाई इन्कार गरेर दिगो शान्ति हुन नसक्ने उनले बताए। अब कुनैपनि बहानामा न्याय ढिलाई गर्न नहुने उनको भनाइ छ। रासस
