काठमाण्डौ / वामदेव गौतम नेतृत्वको नेपाल कम्युनिष्ट पार्टी एकता राष्ट्रिय अभियानले आज भदौ १७ गते केन्द्रिय कमिटीको छैठौं पूर्णबैठक बोलाएको छ । ललितपुरको धोबिघाटस्थित सिद्धार्थ कटेजमा आज बिहान १० बजे बैठक प्रारम्भ हुने जनाईएको छ । एकता अभियानका अध्यक्ष वामदेव गौतमले बैठकको उदघाटन गर्नु हुने कार्यक्रम रहेको छ ।
दुई दिनसम्म चल्ने केन्द्रिय कमिटी बैठकमा यसअघि अभियानको स्थायी कमिटीले पारित गरेका दस्ताबेजहरुमा गहन छलफल हुने जनाईएको छ । एकता अभियानका प्रवक्ता निमकान्त पाण्डेले जनाए अनुसार अभियानको स्थायी कमिटी बैठकले बिभिन्न महत्वपूर्ण निर्णयहरु गरेको छ ।
अत्यन्तै खर्चिलो भैरहेको र जनताबीच अलोकप्रियपनि भैरहेको राज्यका बिभिन्न तहका निर्वाचन प्रणालीको बिकल्पमा जान एकता अभियानको सुझाव रहेको छ । अभियानले प्रदेश संरचनाको खारेजी, स्थानीय तहका सबै प्रमुखहरुको प्रत्यक्ष निर्वाचन जस्तै राज्यका कार्यकारी प्रमुख (राष्ट्रपति वा प्रधानमंत्री) को पनि प्रत्यक्ष निर्वाचन, पूर्ण समानुपातिक निर्वाचन प्रणाली मार्फत संसदको निर्वाचन, सांसदहरु मंत्री बन्न नपाउने लगायतका नयाँ कार्यक्रमहरु प्रस्ताव गरिएको छ ।
स्थायी कमिटीबाट पारित निर्णयहरु केन्द्रिय कमिटीको बैठकमा छलफलका लागि अध्यक्ष वामदेव गौतमले प्रस्तुत गर्नु हुनेछ । बैठकमा अन्य छलफलका विषयहरुमा स्थायी कमिटीबाट पारित राजनीतिक र सांगठनिक प्रतिवेदन , समाजवाद निर्माणको तात्कालिक कार्ययोजना संवन्धि अवधारणा र कार्यक्रम रहेका छन् ।
