काठमाडौं । सुनसरीको धरान उपमहानगरपालिकामा गोरु काटेर मासु भएको विषयमाथि संसदमा आवाज उठेको छ।
बुधबार संसदको विशेष समयमा कांग्रेसका सांसद शंकर भण्डारीले अघिल्लो हप्ता भएको उक्त घटनाको विरोध गर्दै सरकारसँग जवाफ माग गरे।
भण्डारीले सरकारले यसबारेमा के गरिरहेको छ ? भन्दै प्रश्न गरे। उनले सदियौँदेखि विभिन्न विविधता, एकता, श्रद्धाले युक्त देशलाई स्वभाविक र अराजक गतिविधि गरेर दुषित बनाउन खोजिएको आशंका गर्दै यस्ता घटना रोक्नुपर्ने उल्लेख गरे।
उनले वैदिक सत्य सनातन धर्मलाई कमजोर बनाउने, आधारभूत मान्यतालाई आक्रमण गर्ने तथा आस्थाका केन्द्रमा धावा बोल्ने काम गलत भएको बताए। नेपालमा शान्ति, स्थिरता र मेलमिलाप देख्न नचाहने अतिवादीहरुले द्वन्द्व सिर्जना गराइ लाभ लिन खोजेको स्पष्ट भएको जनाए ।
उनले भने, ‘केही दिनअघि धरानमा अस्वभाविक र अराजक घटना भयो । यो घटनाले हामी नेपालीलाई मर्माहत बनाएको छ। गोरु काटेर सामुहिक भोज गरिएको घटनालाई त्यसमा संलग्न उश्रृंखल तत्वहरुले सामाजिक सञ्जालमार्फत प्रचार गर्न खोजेको देखिन्छ । यस्ता अराजकलाई समाजले निगरानी गर्दै हाम्रो विषमतालाई जोगाइराख्न आग्रह गर्छु।’
त्यस्तै राप्रपाका सांसद ज्ञानबहादुर शाहीले पनि घटनाप्रति आपत्ति जनाउँदै सद्भाव बिगार्न खोज्नेलाई कारबाहीको दायरामा ल्याउन माग गरे। सामाजिक सद्भावलाई खलबल्याउने यस्ता कार्यलाई तत्काल रोक्नुपर्ने उनको सुझाव थियो।
