दाङ – लुम्बिनी प्रदेशसभाको तेस्रो अधिवेसनको २० औँ बैठक मंगलबार बस्दैछ। बैठक आज दिउँसो १ बजे बस्नेछ।
सोमबार बैठक बस्ने सूचना जारी भएपनि विशेष कारणले बैठक स्थगीत गरिएको र सो बैठक मंगलबार आज बस्ने तयारी भएको प्रदेश सचिव दुर्लभकुमार पुन मगरले जानकारी दिए।
यसअघिको बैठकमा निजामती कर्मचारीसम्बन्धी विधेयक र स्वास्थ्य संस्था संचालन, नवीकरण तथा व्यवस्थापन गर्न बनेको विधेयक पेस भएका थिए।
आजको बैठकमा मुख्यमन्त्री डिल्लीबहादुर चौधरीले ‘प्रदेश निजामती सेवाको गठन, सञ्चालन र सेवाका शर्त सम्बन्धमा व्यवस्थापन गर्न बनेको विधेयक’ माथि सैद्धान्तिक छलफल गरियोस् भन्ने प्रस्ताव सभामा प्रस्तुत भइ सभामुखले उक्त प्रस्तावलाई निर्णयार्थ प्रस्तुत गर्ने र छलफलमा उठेका प्रश्नहरूको जवाफ मुख्यमन्त्रीले दिने सम्भावित कार्यसूची रहेको छ।
सभामुख तुलाराम घर्तीले विधेयक प्रमाणीकरण सम्बन्धी पत्र पढेर सुनाउने, प्रदेशसभा सदस्यहरूले समसामयिक विषयमा शून्य समयमा बोल्ने, कार्यव्यवस्था परामर्श समितिमा सदस्यको नाम हेरफेर सम्बन्धी जानकारी गराउने कार्यसूची रहेको छ।
