पोल्याण्डले युरोपेली सङ्घ (इयू) ले रूसविरूद्ध लगाएको पछिल्लो प्रतिबन्ध ‘निकै नरम र कमजोर’ भएको जनाएको छ।
पोल्याण्डका प्रधानमन्त्री मेटुज मोराविकीले रूसले युक्रेनविरूद्ध आक्रमण सुरू गरेको एक वर्ष पुगेको दिन शुक्रबार युक्रेनको भ्रमणका क्रममा रुसविरुद्ध युरोपेली सङ्घ (इयू) ले लगाएको पछिल्लो प्रतिबन्ध ’निकै नरम र कमजोर’ भएको बताएका हुन्।
ब्रसेल्समा रूसविरूद्ध प्रतिबन्धको नयाँ प्याकेज घोषणा गर्ने चर्चा चलिरहेका समय पोल्याण्डको आपत्तिका कारण वार्ता रोकिएको युरोपेली कूटनीतिज्ञहरूले बताएका थिए।
‘जहाँसम्म १० औँ प्रतिबन्ध प्याकेजको कुरा छ, हामी यसमा खुसी छैनौँ किनभने यो धेरै नरम छ, धेरै कमजोर छ। हामी प्रस्ताव गर्दछौँ कि थप व्यक्तिहरू समावेश गरियोस्,’ मोराविकीले कीभमा भने।
ब्रसेल्सस्थित कूटनीतिक स्रोतले पोल्याण्डले कडा कदम चाल्न गरेको मागका कारण अझै पनि ‘निकै महत्त्वपूर्ण’ प्याकेज कार्यान्वयन गर्न ढिलाइ भइरहेको गुनासो गरेका छन्।
दशौँ चरणको प्रतिबन्धले युरोपेली सङ्घको स्वामित्वमा रहेका तीन वटा रुसी बैंकको सम्पत्ति रोक्का गर्ने, वार्षिक ११ अर्ब युरो (११.६ अर्ब अमेरिकी डलर) बराबरका सामानको निर्यात नियन्त्रण गर्ने र मस्को आपूर्ति गर्ने इरानी ड्रोन निर्मातालाई असर गर्नेछ।
तर पोल्याण्डले रुसबाट टायर बनाउन प्रयोग हुने सिन्थेटिक रबरको आयातमा पनि प्रतिबन्ध लगाउन चाहेको एएफपीसँगको कुराकानीमा कूटनीतिज्ञहरूले नाम नबताउने सर्तमा बताएका छन्।
