काठमाडौं । प्रधानमन्त्री पुष्पकमल दाहाल प्रचण्डले राष्ट्रपतिमा एमाले समेतको भूमिका खोजेका छन् । आइतबार गोरखामा भएको एक कार्यक्रममा बोल्दै उनले एमालेसँग कुराकानीबाट राष्ट्रपतिमा सर्वसम्मत हुन सके राम्रो हुने बताएका हुन्।
‘चुनावमा हामी एउटा गठबन्धनबाट गएका थियौं। तर म भिन्न तरिकाले प्रधानमन्त्री भएँ । फेरि राष्ट्रपति चुनावका लागि मनोनयनसम्म आइपुग्दा ८ दल एक ठाउँमा भइयो।
राष्ट्रिय सहमतिका लागि एमालेसँग पनि कुराकानी भइरहेको छ’, उनले भने । माओवादीसहित ८ दलबाट शनिबार राष्ट्रपति उम्मेदवारी दिइएको बताउँदै उनले गठबन्धनले उठाएको उम्मेदवारको पक्षमा एमालेको भूमिका खोजेका हुन् ।
शनिबार गठबन्धनको तर्फबाट राष्ट्रपतिमा कांग्रेसका नेतासमेत रहेका पौडेलले उम्मेदवारी दर्ता गरेपछि सहमतिबाट एमाले कतै जान नसक्ने उनले बताएका थिए । एमालेबाट नेता सुवासचन्द्र नेम्वाङ राष्ट्रपति उम्मेदवार छन्। नेम्वाङ नै राष्ट्रपतिमा सर्वसम्मत उम्मेदवार हुने एमालेले दाबी गर्दै आएको छ ।
