काठमाडौं । नेपाली कांग्रेसका सांसद प्रकाशमान सिंहले काठमाडौं लगायत देशभरका सरकारी तथा प्रहरी कार्यालय परिसरमा सयौं मोटरसाइकल र गाडीहरु थन्क्याएर राखिएको जनाएका छन्।
शुक्रबार प्रतिनिधि सभाको शून्य समयमा बोल्दै सांसद सिंहले प्रयोगविहीन बनाएका करोडौं मूल्य बराबरका मोटरसाइकल र गाडीलाई उपयोगविहीन नबनाउन आग्रह गरेका छन्। उनले भने, ‘काठमाडौं लगायत देशभरका सरकारी तथा प्रहरी कार्यालय परिसरमा सयौं मोटरसाइकल र गाडीहरु थन्क्याएर राखिएको छ। वर्षौंसम्म थन्क्याइँदा ती प्रयोगविहीन भएका छन्।’
उनले ती सवारी साधनहरु लैजान भनेर सूचना जारी गर्दा पनि सवारी धनीहरुले किन लगेनन् भन्दै प्रन गरे। ’सवारी धनीले लग्दैनन् भने लिलामी गर्नुपर्ने होला,’ उनले भने, ‘यसरी अस्तव्यस्त बनाएर छाड्दा ती करोडौंका सामान कवाडीमा परिणत बनेका त छन् नै, तिनले सफा शहर बनाउने अभियानमा पनि चुनौती थपेका छन्।
अर्कोतिर सामान्य मर्मत गर्दा पनि चल्ने गाडीहरु पनि मर्मत नगरी थन्क्याउने र नयाँ गाडी चढ्ने लोभमा अर्बौं रुपैयाँ नयाँ सवारी साधन खरिदमा खर्च गर्ने काम भइरहेको छ। यसको समस्या समाधान गरिनुपर्छ।’ उनले पुराना थोत्रा गाडीहरुको व्यवस्थापनमा कानुनी अप्ठ्यारा छन् भने त्यसमा के सुधार गर्नुपर्नेमा जोड दिँदै करोडौं मूल्यका गाडी मोटरसाइकल उपयोगविहीन बनाएर वातावरण समेत अस्तव्यस्त नबनाउन सरकारको ध्यानाकर्षण गराएका छन।
