काठमाडौं । सिंहदरबार गेटमा भ्रष्टाचारविरोधी नारा लगाउन पुगेका एक व्यक्तिलाई प्रहरीले पक्राउ गरेको छ । पक्राउ पर्नेमा धनकुटाका लाक्पा तामाङ रहेका छन् । धनकुटामा वायर हाउस निर्माणको एक आयोजनामा भ्रष्टाचार भएको भन्दै कारबाहीको माग गर्न सिंहदरबार पुगेका तामाङलाई दक्षिण गेटबाट पक्राउ गरिएको हो ।
स्थानीय तह र केही सीमित व्यक्तिको मिलेमतोमा ३ करोडको आयोजनामा टहरोजस्तो मात्र संरचना बनाएर भ्रष्टाचार गरेकोले अख्तियार र राप्रपा अध्यक्ष एवं ऊर्जामन्त्री राजेन्द्र लिङदेनसमक्ष फायल बुझाएको तामाङका साथी तेजराज भुजेलले बताए ।
सांसद ज्ञानेन्द्र शाहीसँग आज भेट्न नदिएपछि लाक्पाले गेटमै फायल च्यातेर नाराबाजी गरेको जनाइएको छ । निषेधित क्षेत्रमा अमर्यादित गतिविधि गरेको आरोपमा प्रहरीले लाक्पालाई पक्राउ गरिएको बताएको छ ।
